Жон Хили: Сулҳдан кейин Украинага қўшин юборишни хоҳлайман

Буюк Британия мудофаа вазири Жон Хили тинчликни таъминлаш учун Украинага британиялик ҳарбийларни юборган илк вазир бўлишга умид қилмоқда. У бу ҳақда якшанба, 22 феврал куни The Telegraph нашрига берган шарҳида билдирди.

Хили таъкидлашича, Россиянинг Украинага қарши уруши 2026 йилда якунланиши керак. “Ҳар қандай ҳукумат ёки мудофаа вазири учун қуролли кучларни бошқа давлатдаги операцияга юбориш ҳақида қарор қабул қилишдан оғирроқ масъулият йўқ”, — деб ҳисоблайди у. “Мен Украинага британ қўшинларини юборган айнан ўша мудофаа вазири бўлишни хоҳлайман, чунки бу фақат бир нарсани англатади: ниҳоят бу уруш тугаган бўлади”, — деб ўз позициясини тушунтирди Хили.

У қўшимча қилишича, британиялик ҳарбийларни Украинага юбориш фақат тинчликка эришилган тақдирда мумкин. Вазир сўзларига кўра, “хавфсиз Европа учун кучли, суверен Украина керак”.

The Telegraph’га берган изоҳида Хили, шунингдек, Буюк Британия ҳукумати Украинани “янада қатъийроқ қўллаб-қувватлаш”да давом этишини ишонтирди. Хусусан, мамлакат ҳокимияти ҳарбий ёрдам ҳажмини ошириш ва Кремлга янги санкциялар орқали босимни кучайтиришни режалаштирмоқда.

“Бу уруш бизга — ва Путинга бир муҳим нарсани кўрсатди: украин халқи иродасини ҳеч қачон кам баҳолаш керак эмас”, — дея хулоса қилди у.