Мирзо Улуғбек туманида кўп қаватли уйда ёнғин содир бўлди

Бугун, 3 март куни соат 03:26 да Тошкент шаҳри Мирзо Улуғбек тумани, Буюк Ипак йўли кўчасида жойлашган кўп қаватли уйдаги хонадонларнинг бирида ёнғин содир бўлгани тўғрисида Тошкент шаҳар Фавқулодда вазиятлар бош бошқармасига хабар келиб тушди.

Фото: Ижтимоий тармоқлар

Қутқарув экипажлари воқеа жойига 8 дақиқа ичида етиб бориб, ёнғинни қисқа вақт ичида бартараф этди. Ҳодиса оқибатида тан жароҳати олганлар қайд этилмади.

Маълум қилинишича, қутқарув бўлинмалари соат 03:34 да манзилга етиб борган ва соат 03:40 да ёнғин тўлиқ ўчирилган. Тезкор ва мувофиқлаштирилган ҳаракатлар туфайли ёнғиннинг бошқа хонадонларга тарқалишининг олди олинган.

Аниқланишича, тўрт қаватли уйнинг иккинчи қаватида жойлашган хонадонда тахминан 10 кв м майдонда уй жиҳозлари ёниб зарарланган.

Ҳодиса оқибатида ҳалок бўлганлар ва тан жароҳати олганлар йўқ. Айни пайтда ёнғин келиб чиқиш сабаблари ва моддий зарар миқдори аниқланмоқда.