ФИФА президенти Жанни Инфантино 2026 йилги жаҳон чемпионати вақтида фаоллик билан танқид қилинди. Айниқса АҚШ миллий жамоаси ҳужумчиси Фоларин Балогуннинг дисквалификацияси Доналд Трампнинг қўнғироғидан кейин тўхтатиб турилиши кўпчиликнинг ғазабини келтирди. Аммо жамоат арбоблари сукут сақлашни афзал кўришди ёки ўз норозиликларини журналистларга аноним тарзда етказишди.
Турнир якунланганидан кейин эса вазият ўзгара бошлади: Ла лига раҳбари Ҳавиер Тебас швейцариялик мулозимни истеъфо беришга чақирди, унга ФИФА собиқ раҳбари Йозеф Блаттер ҳам қўшилди.
«Сув ичиш учун танаффус – алдов»
Тебаснинг норозилигига ЖЧ-2026 турниридаги янгиликлар сабаб бўлди. У биринчи навбатда финал ўйинида юзага келган ярим соатлик танаффусни, шунингдек, бўлимлар ўртасида сув ичиш учун қилинган кулинг брекларни танқид қилди.
«ФИФА барчасини ўзи хоҳлагандек – футбол учун эмас, балки ўз манфаатлари йўлида ташкиллаштиради. Шунинг учун, улар 28 дақиқалик танаффус хоҳлашса, буни қилишади. Сув ичиш учун танаффуслар – алдов. Шунчаки реклама паузаси. Ла лигада ҳам бундай танаффуслар бор, аммо фақат жуда иссиқ бўлган вақтларда», – дея Тебаснинг сўзларини келтиради La Gazzetta dello Sport.
Функционер Даллас, Лос-Анжелес ва Атлантадаги стадионларда кондиционерлар ишлаб турганини таъкидлаган. Ўзининг айтишича, совқотиб қолмаслик учун свитер кийиб ўтирган.
Ла лига раҳбарига ЖЧ-2030 иштирокчилари сонини 64 тага ошириш ғояси ҳам ёқмаган. Бу борада ҳозирча расмий эълон бўлмади, аммо бундай вариант ОАВда фаол муҳокама қилинмоқда – шу кунларда Жанубий Америка футбол конфедерацияси (КОНМЕБОЛ) раҳбари Алехандро Домингес ҳам бу борада гапириб чиқди.
«Биз тақвим бўйича бир неча бор хавотир билдирган эдик, энди эса улар турнирни 64 та терма жамоагача кенгайтирмоқчи. Футбол саноати жаҳон чемпионати билан чекланиб қолмайди, гарчи бу энг муҳим воқеа бўлса ҳам», – дея қўшимча қилган Тебас.
Ҳавиер Инфантино лавозимини тарк этиши лозимлигини таъкидлади. Бошқа кўплаб функционерлар ҳам бу фикрга қўшилади, аммо улар ўз норозилигини очиқ изҳор этишдан чўчишади.
«Мен Инфантинонинг вақти тугади, деб ҳисоблайман. Аммо Жаннини тизим, федерациялар қўллайди. Мухолиф номзодлар йўқ, ҳеч ким ютқазиши аниқ бўлганда ўз номзодини илгари суришни истамайди. Тизим шундай ва у таг-туби билан бузилган», – дея сўзларини якунлаган ушбу функционер.
