Зеленский Яқин Шарқ ҳақида: Украина Эрон билан уришмаяпти

Украина президенти Володимир Зеленский 14 март куни журналистлар билан учрашув чоғида Яқин Шарқ давлатларига Эроннинг камикадзе-дронларидан ҳимояланиш масаласи бўйича “экспертиза ўтказа оладиган” учта мутахассислар гуруҳи юборилганини маълум қилди.

“Жиддий гуруҳлар юборилган. Ҳар бир гуруҳ — ўнлаб одамлардан иборат. Бу уч-тўрт киши қаергадир бориб, ниманидир кўрсатиб келиш ҳақида эмас. Учта учиб кетган гуруҳ экспертиза ўтказиш ва бу қандай ишлаши кераклигини кўрсатишга қодир”, — дея Зеленскийнинг сўзларини “Интерфакс-Украина” агентлиги келтирган.

Украина раҳбари гап фақат экспертиза ҳақида кетаётганини алоҳида таъкидлади.

“Гап қаердадир операцияларда иштирок этиш ҳақида эмас. Биз Эрон билан уришмаяпмиз. Гап ҳимоя ва бизнинг томондан дронларга қарши қандай курашиш бўйича аниқ, тўлиқ экспертиза ҳақида кетмоқда”, — деди у.

Зеленскийнинг сўзларига кўра, бу давлатлар билан янада асосли ва узоқ муддатли келишувлардан бири дронлар бўйича битим бўлиши мумкин. Украина улар билан бу ёрдам эвазига нима олишини муҳокама қилади.

“Очиғини айтсам, бугун биз учун ҳам технологиялар, ҳам пул муҳим. Шунинг учун қараймиз. Агар шундай форматдаги Drone Deal амалга ошса, демак, шундай бўлади”, — деди президент.

У, шунингдек, Украина қарийб бир йил аввал таклиф қилган, қиймати тахминан 35–50 миллиард доллар бўлган дронлар ишлаб чиқариш бўйича АҚШ билан келишув имзолашни исташини билдирди. Аммо Киев бу таклиф юзасидан Вашингтондан ҳалигача “аниқ жавоб” олмаган, гарчи Америка томони бу масалага “жуда қизиқиш” билдираётган бўлса ҳам.

Шу билан бирга, Володимир Зеленский ҳозир АҚШ кўпроқ Яқин Шарқдаги урушга эътибор қаратаётганини, бу можаро эса Вашингтоннинг Украинага бўлган диққат даражасига таъсир қилиши мумкинлигини қўшимча қилди.

“Украинани ҳаво ҳужумидан мудофаа ракеталари билан таъминлаш бўйича хавф мавжуд. Муқобил вариант сифатида Украина Европанинг SAMP/T тизимларини кўриб чиқмоқда ва агар улар баллистик нишонларга қарши синовларда муваффақиятли натижа кўрсатса, уларни олишда биринчи навбатда туриш бўйича келишмоқда”, — деди у.

Шу билан бирга, Украина президенти АҚШ билан яхши муносабатлар Украина учун ниҳоятда муҳим бўлиб қолаётганини таъкидлади.

“Биз америкаликларни йўқотишни истамаймиз, бу ҳақда очиқ гапиряпмиз”, — деди Зеленский.

Аммо у АҚШнинг Россия нефтига қарши эҳтимолий санкцияларни юмшатиш бўйича позицияси эҳтимолий энергетик инқироздан чиқиш йўли эмаслигини ҳам қайд этди.

“Менимча, Россияга қарши санкцияларни бекор қилиш дунёга ёрдам бермайди, фақат Россияга ёрдам беради. Балки айрим мамлакатларга жуда қисқа муддатга энергия таъминоти ҳажми нуқтаи назаридан бироз енгил бўлар. Лекин буларнинг барчасини ҳамма бошидан ўтказган. Барибир охир-оқибат сен илгакка тушасан”, — деди президент.

Украина ва Венгрия ўртасидаги таранг муносабатлар фонида Украина етакчиси “Дружба” нефт қувури атрофидаги вазиятга ҳам изоҳ берди. Зеленскийнинг сўзларига кўра, ҳозир айрим давлатлар амалда Украинани ушбу қувур орқали етказиб беришни қайта тиклашга мажбурламоқда, бу эса президент фикрича, Россияга қарши санкцияларни бекор қилиш билан баробардир.

Зеленский Россия нефти экспортини қайта тиклашга қарши эканини таъкидлади.

“Аммо агар менга шундай шарт қўйилсаки, Украина қурол олмайди, унда, кечирасиз, бу масалада мен ожизман. Мен Европадаги дўстларимизга бу шантаж деб аталишини айтдим”, — деди давлат раҳбари.