Испанияда Франция миллий жамоаси ҳақидаги баёнот ортидан сиёсий можаро авж олди

Испаниянинг собиқ бош вазири Мариано Рахой футбол бўйича жаҳон чемпионатида иштирок этаётган Франция миллий жамоаси ҳақида билдирган фикрлари ортидан ирқчилик ва ксенофобияда айбланмоқда. Унинг «Франция жамоасида бирорта ҳам француз футболчиси йўқ», деган гаплари Испания ва Франция сиёсатчилари ҳамда жамоатчилик томонидан кескин танқид қилинди.

Фото: REUTERS

Маълум қилинишича, можарога Рахойнинг 10 июл куни Испаниянинг El Debate интернет нашрида эълон қилинган мақоласи сабаб бўлган. Унда собиқ ҳукумат раҳбари футбол бўйича Жаҳон чемпионати-2026 ҳақида фикр юритар экан, 14 июл куни яримфиналда Испаниянинг рақиби бўладиган Франция жамоасини кучли рақиб сифатида баҳолаган. Бироқ шу билан бирга, жамоада «бирорта ҳам француз футболчиси йўқ» деган баҳсли фикрни ҳам илгари сурган.

Бу баёнотга биринчи бўлиб Испания бош вазири Педро Санчес муносабат билдирди. У ижтимоий тармоқда айримлар ҳали ҳам инсоннинг мамлакатга мансублигини фамилияси, туғилган жойи ёки тери ранги билан баҳолашини, бошқалар эса унинг мамлакатга садоқати ва унинг тараққиётига қўшган ҳиссаси билан ўлчашини таъкидлади.

«Испания уни севадиган ва унинг равнақи учун меҳнат қиладиган барчага тегишли. Ксенофобик баёнотлар билан мамлакат обрўсига путур етказадиганларга эмас. Франция, яримфиналда кўришамиз. Кучли жамоа ғалаба қозонсин, ирқчилик эса мағлуб бўлсин», — дея ёзди Санчес.

Испания транспорт вазири Оскар Пуэнте ҳам Рахойнинг фикрларини қаттиқ қоралади. У собиқ бош вазирни Франциско Франко диктатураси даври ғояларига мойилликда айблаб, кескин танқид қилди.

Рахойнинг баёноти Францияда ҳам кенг муҳокамаларга сабаб бўлди. Мамлакат ички ишлар вазири Лоран Нунес BFMTV телеканалига берган интервюсида бу сўзларни «мутлақо қабул қилиб бўлмайдиган» баёнот деб баҳолади.

Франциянинг денгизорти ҳудудлари бўйича вазири Наима Мучу эса ушбу фикрларни Францияга ва мамлакат ифодалайдиган қадриятларга қарши йўналтирилган нафратнинг яна бир кўриниши сифатида баҳолади.

Франциянинг Мадриддаги элчихонаси ҳам ижтимоий тармоқларда расмий муносабат билдирди. Унда Франция миллий жамоасининг барча футболчилари Франция фуқаролари экани таъкидланди. Қайд этилишича, жамоанинг 26 нафар футболчисидан 23 нафари Франция ҳудудида туғилган, хорижда туғилган уч нафар футболчи ҳам Франция фуқаролигига эга.

Мазкур воқеа Европа жамоатчилигида миллий мансублик, фуқаролик ва кўп миллатли жамиятлар ҳақидаги баҳсларни яна бир бор кун тартибига олиб чиқди.