Қандай қилиб Emirates борткузатувчиси бўлиш мумкин?

Ўзбекистондан Emirates’га ишга қандай кириш мумкин?

Ўзбекистон фуқаролари Emirates’га тўғридан тўғри ариза топширишлари мумкин, фуқаролик бўйича чекловлар йўқ. 

Танловда иштирок этиш учун қуйидаги талабларга жавоб бериш лозим:

● 21 ёшдан кичик бўлмаслик;

● камида ўрта маълумотга эга бўлиш;

● инглиз тилини оғзаки ва ёзма равишда эркин билиш;

● бўйи камида 160 см бўлиши ва оёқ учида турган ҳолда 212 см баландликка ета олиш;

● мижозларга хизмат кўрсатиш соҳасида камида бир йиллик иш тажрибасига эга бўлиш;

● Emirates формасини кийганда кўриниб турадиган татуировкаларга эга бўлмаслик;

● Дубайга кўчиб ўтиш ва у ерда ишлашга тайёр бўлиш.

Emirates’га ариза қандай топширилади?

Агар талабларга жавоб берсангиз, кейинги босқич — Emirates’нинг расмий карера портали орқали онлайн ариза топшириш ҳисобланади. Авиакомпания номзодларнинг анкеталарини шу портал орқали қабул қилади ва борткузатувчиларини ишга қабул қилиш бўйича тадбирлар жадвалини эълон қилади.

Ариза топшириш учун қуйидагиларни бажариш лозим:

1. Emirates Group Careers сайтига ўтиш

2. Қидирувда Cabin Crew вакансияларини топиш

   

3. Apply’ни босиш, рўйхатдан ўтиш ёки шахсий кабинетга кириш.

   

4. Анкета тўлдириш ва резюме юклаш.

Тадбирлар жадвали мунтазам янгиланиб туради, шунинг учун ариза беришдан олдин расмий сайтда долзарб саналарни текшириш керак.

Emirates’га танлов қандай ўтади?

Анкета кўриб чиқилгандан сўнг номзодлар танловнинг икки шаклидан бири — Open Day ёки Assessment Day босқичига таклиф қилинади. Қайси босқичдан ўтиш лозимлиги ариза қандай тарзда топширилгани ва рекрутерлар қандай қарор қабул қилганига боғлиқ.

Open Day

Open Day — танловнинг очиқ куни бўлиб, унда исталган киши иштирок этиши мумкин. Иштирок этиш учун олдиндан таклифнома талаб этилмайди.

Одатда Open Day'да рақобат жуда юқори бўлади. Кун давомида рекрутерлар дастлабки саралашни ўтказади ва энг муносиб иштирокчиларни танловнинг кейинги босқичларига таклиф қилади.

Assessment Day

Assessment Day — танловнинг ёпиқ босқичи бўлиб, унда фақат Emirates таклифи бўйича иштирок этиши мумкин. Бундан олдин рекрутерлар номзоднинг резюмеси ва анкетасини ўрганиб чиқади ҳамда уларнинг фикрича вакансия талабларига энг яхши жавоб берадиган номзодларни таклиф қилади.

Одатда Assessment Day босқичида 50–100 нафар номзод иштирок этади, шунинг учун рақобат Open Day'га нисбатан анча паст. Шу сабабли сифатли тузилган резюме муҳим аҳамиятга эга, чунки у тўғридан тўғри Assessment Day босқичига таклиф олиш имкониятини оширади.

Emirates учун резюме қандай ёзилади?

Айнан резюме танловнинг биринчи босқичи ҳисобланади. Номзод Assessment Day босқичига таклиф олиши ёки фақат Open Day'да иштирок этиши унинг қай даражада тўғри ва пухта тузилганига боғлиқ.

Резюме тузишда қуйидагилар тавсия этилади:

●      барча маълумотни бир саҳифага жойлаштириш;

●      оқ фондаги фотографиядан фойдаланиш (аёллар учун — тартибли макияж ва сочлар йиғиштирилган);

●      бўйини кўрсатиш;

●      резюме бошида «Ўзи ҳақида» қисқа блок қўшиш;

●      хизмат кўрсатиш соҳасидаги иш тажрибаси ва инглиз ҳамда бошқа тилларни билиш даражасини ёзиш;

●      борткузатувчи учун муҳим бўлган киришимлилик, жамоада ишлаш, стрессга чидамлилик ва ностандарт вазиятларни ҳал қила олиш қобилиятларини кўрсатиш;

●      матнда имло хатолари бўлмаслигига эътибор қаратиш.

Араб тилини билиш шарт эмас, лекин қўшимча устунлик бериши мумкин.

Assessment Day’га қандай кийиниб бориш керак?

Ташқи кўриниш – номзодни баҳолаш мезонларидан бири. Emirates номзоднинг авиакомпания корпоратив кийиниш услубига имкон қадар яқин бўлган услубда келишини кутади. 

Аёллар учун классик ишбилармон услубидаги костюм тавсия этилади: тиззадан пастга тушадиган қора қалам-юбка, оқ кўйлак, қора пиджак ва баланд пошнали ёпиқ қора туфли. Сочлар, одатда, йиғиштирилади, макияж меъёрида қилинади, кўпинча Emirates корпоратив услубига мос қизил лаб бўёғидан фойдаланилади.

Ўзи билан қуйидагиларни олиб келиш керак:

●      қоғозга чиқарилган резюме;

●      паспорт ва таклифномада кўрсатилган бошқа ҳужжатлар;

●      Emirates сайтидаги шахсий кабинетга кириш учун маълумотлар.

Assessment Day бутун кунни олади, шунинг учун эртароқ келиш керак. Кеч қолиш танловга киритилмасликка сабаб бўлиши мумкин.

Assessment Day қандай ўтади?

Assessment Day бир нечта босқичдан иборат, ҳар бирида номзодларнинг турли кўникмалари баҳоланади.

Ўзини таништириш. Номзодга ўзи ҳақида гапириб бериш учун икки дақиқа вақт берилади. Ишонч билан, узоқ танаффусларсиз гапириш ҳамда қўшимча саволларга, масалан, саёҳат қилиш учун энг севимли йўналиш ҳақидаги саволларга жавоб беришга тайёр бўлиш лозим.

Жамоавий топшириқ. Иштирокчилар жамоаларга бўлинади ва умумий вазифани бажариш таклиф этилади. Рекрутерлар етакчилик қобилиятини эмас, балки бошқаларни тинглаш, ғоялар таклиф қилиш, ҳамкасблар фикрини ҳурмат қилиш ва муросага келиш каби жамоада ишлаш кўникмасини баҳолайди.

Инглиз тилидан тест. Одатда бу ёзма топшириқ бўлиб, унда грамматикани билиш, матнни тушуниш ва тил билишнинг умумий даражаси текширилади.

Якуний суҳбат. Сўнгги босқичда номзоднинг аввалги иш тажрибаси, мотивацияси ва мураккаб вазиятлардаги хатти-ҳаракатлари ҳақида саволлар берилади. Кўпинча «Нима учун Emirates'да ишлашни хоҳлайсиз?» ва «Мижоз билан юзага келган низони ҳал қилишга тўғри келган ҳолат ҳақида сўзлаб беринг» каби саволлар учрайди. Жавобларни STAR методикаси асосида бериш тавсия этилади: вазиятни, қўйилган вазифани тавсифлаш, ўз ҳаракатлари ва натижани баён қилиш.

Emirates борткузатувчилари қанча маош олади?

Emirates борткузатувчилари даромади бир нечта қисмдан иборат. Белгиланган маошдан ташқари, ходимлар парвоз соатлари учун тўлов ва сафарлар учун суткалик ҳақ олишади.

Emirates маълумотларига кўра, маошга қуйидагича:  

●      базавий маош — ойига 4 980 AED;

●      парвоз соатлари учун тўлов — парвознинг ҳар бир соати учун 69,6 AED;

●      Дубайдан ташқарида тунаганлик учун суткалик ҳақ.

Ойига ўртача 80–100 соат парвозда жами 11 244 AED (тахминан 3 061 доллар) олиш мумкин.

Иш ҳақидан ташқари, компания ходимларни Дубайда турар жой билан таъминлайди, аэропортга бориш ва қайтиш учун трансфер ташкил қилади ҳамда иш бошлашдан олдинги 7,5 ҳафталик ўқув дастури харажатларини ҳам қоплайди. БААда жисмоний шахсларнинг даромадлари солиққа тортилмайди.

Тажриба орттириб борган сари борткузатувчилар бизнес ва биринчи класс йўловчиларига хизмат кўрсатишга ўтишлари, кейинчалик эса Cabin Supervisor ва Purser лавозимларига даъвогар бўлишлари мумкин. Бу масъулият даражаси ва иш ҳақининг ошиши билан бирга кечади.

Танловдан муваффақиятли ўтгандан сўнг нима бўлади?

Агар номзод танловнинг барча босқичларидан муваффақиятли ўтса, Emirates унга иш таклифини (Job Offer) юборади. Таклиф қабул қилингач, БААга кўчиб ўтиш учун иш визаси ҳамда бошқа зарур ҳужжатларни расмийлаштириш жараёни бошланади.

Шундан сўнг бўлажак борткузатувчи Дубайга кўчиб ўтади ва у ерда мажбурий ҳақ тўланадиган ўқув курсини ўтайди. Ушбу курсни муваффақиятли тамомлаганидан кейингина янги ходимларга рейсларда ишлашга рухсат берилади.

Ариза беришдан олдин нималарни билиш керак?

●      Ўзбекистон фуқаролари Emirates’да ишлашлари мумкин, фуқаролик бўйича чекловлар йўқ.  

●      Сифатли резюме Open Day ўрнига тўғридан тўғри Assessment Day’да қатнашиш имкониятини оширади.

●      Мижозлар билан ишлаш тажрибаси устунлик беради. Меҳмонхона, ресторан, туризм, банк, дўкон ёки бошқа хизмат кўрсатиш соҳалари мос келади.

●      Assessment Day нафақат билимларни, балки шахсий сифатларни ҳам баҳолайди. Рекрутерлар жамоада ишлаш, одамлар билан мулоқот қилиш ва стрессли вазиятларда хотиржамликни сақлай олиш салоҳиятига эътибор қаратишади.

●      Долзарб вакансия ва саналар фақат Emirates расмий сайтида эълон қилинади, шунинг учун ариза беришдан олдин у ердаги маълумотларни текшириш тавсия этилади.