2026 йилнинг 9 ойида Ўзбекистондаги энг йирик автомобил ишлаб чиқарувчи компания –UzAuto Motorsʼнинг умумий даромадлари 30,1 трлн сўмни ташкил этди. Бу – ўтган йилнинг мос давридагидан (34,7 трлн сўм) 13 фоизга кам.

Ҳисобот даврида компания соф фойдаси 1,8 трлн сўм бўлган. Бу кўрсаткич 2025 йилнинг январ-сентябр ойларига нисбатан (3,5 трлн сўм) қарийб икки баравар қисқарган.

Компаниянинг сотилган маҳсулотлар таннархи 30,6 трлн сўмдан 27,2 трлн сўмга қисқарган. Натижада ялпи фойда 4,1 трлн сўмдан 2,9 трлн сўмгача камайган. Шунингдек, UzAuto Motors’нинг операцион фаолиятидан олган фойдаси 2,9 трлн сўмдан 1,3 трлн сўмга тушиб, 56,2 фоизга қисқарган. Солиқ тўлангунга қадар фойда эса 4,09 трлн сўмдан 2,15 трлн сўмга камайган.

Нега фойда камайиб кетди?

Фойда қисқаришининг биринчи ва энг асосий сабаби — ички бозорда автомобиллар сотувининг тушиб кетишидир. Бунинг ортидан компаниянинг соф тушуми 34,7 трлн сўмдан 30,1 трлн сўмгача ёки 13 фоиздан кўпроққа қисқарди. Ушбу тенденция UzAuto Motors’нинг энг харидоргир модели бўлган Cobalt мисолида яққол акс этади. Йилнинг биринчи ярмида Cobalt ишлаб чиқариш ҳажми 13,5 фоизга ўсиб, 82 минг 951 донага етган бир пайтда ички бозордаги сотувлар 67 минг 580 донадан 40 минг 936 донагача камайган. Бу шуни англатадики, жорий йилнинг январ-июн ойларида заводдан чиққан Cobalt’ларнинг атиги 49 фоизи маҳаллий бозорда харидорини топган. Қолган қисми ё экспортга йўналтирилган ёки омборларда захира сифатида музлаб ётибди. Бу бўйича аниқ расмий рақамлар очиқланмаган. Autostrada нашрининг ёзишича, 2026 йил 30 июн ҳолатига кўра UzAuto Motors омборларида йиғилган, аммо сотилмаган Chevrolet автомобилларининг қиймати 954 млн долларни ташкил этган.

Талабнинг бу қадар пасайиши компаниянинг йиллар давомида шаклланган савдо сиёсатида кескин ўзгаришларга сабаб бўляпти. Яқин ўтмишда Cobalt каби моделлар учун харидорлардан энг камида 50 фоиз олдиндан тўлов талаб қилинган ва ойлаб навбатлар кутилган бўлса, бугунги кунга келиб харидорларни ушлаб қолиш мақсадида ушбу модел чегирмалар ҳамда ўз нархида устамасиз муддатли тўлов шартлари асосида таклиф этилмоқда.