АҚШ президенти Доналд Трамп шанба куни Truth Social ижтимоий тармоғида аралаш яккакурашлар промоутери ҳамда UFC чемпионати раҳбари Дэйна Уайтга Оқ уй матбуот котиби бўлиш таклифи билдирилган пост жойлади. Улар азалдан яқин алоқаларга эга. Ёзда Оқ уй майсазорида ўрнатилган қафасда UFC турнири ўтказилганди.
«Дэйна тарихдаги энг зўр матбуот котиби бўлади. Дэйна, илтимос, бу ишни ўз зиммангга ол!» – дея ёзган Трамп.
Унинг постидан бу таклиф қанчалик жиддийлиги ёки у ҳазиллашаётганини англаб бўлмайди.
Оқ уй матбуот котиби лавозими октябр ойи ўрталаридан Кэти Закария бу лавозимда атиги бир ҳафта ишлаб, шов-шувли тарзда истеъфога чиққанидан буён бўш турибди.
Трампнинг бу пости Республикачилар партияси оралиқ сайловларда мағлубиятга учраб, АҚШ конгрессининг иккала палатаси устидан назоратни йўқотиши ортидан ёзилмоқда.
Президент Уайтга иш таклиф қиларкан, уни «ёввойи жангчи ва баҳодир» деб атаган ҳамда UFC чемпионатининг бошқа мамлакатдан бўлган таниқли иштирокчиларини ҳам ишга жалб қила олиш имкониятига қизиққан.
Трамп ўз постида россиялик Ислам Махачев ва Хабиб Нурмагомедов номларини тилга олган. «Бизга бу одамлар телба сўллардан ҳимояланиш учун керак», – деган АҚШ президенти UFC жангчилари фотосуратлари илова қилинган постда.
Трампнинг постидан кейин Уайт инстаграмдаги сторисида ўзи Оқ уйдаги брифинглар залида матбуот котиби минбари ортида тургани акс этган коллажни жойлаштирди.
«Кейинги босқичга ўтяпман», – дея ёзган у. UFC раҳбарининг бу сўзлари қанчалик жиддийлиги ёки у шунчаки Трампнинг гапини давом эттираётганини билиб бўлмайди.
Шанба куни Лондонда бокс бўйича ўтган турнирдан кейинги матбуот анжуманида Уайт душанба куни Оқ уйда Трамп билан учрашиши ҳақида айтди.
«Менинг ишларим шусиз ҳам кўп. Ишончим комилки, биз муҳокама қиладиган гаплар бўлади», – деган Уайт Трампнинг таклифига қизиқиши бор ёки йўқлигига аниқлик киритмасдан.
