7 ноябр куни Полшанинг Краков шаҳридаги бозор майдони ҳудудида ўткинчиларни ўтга тутган шахснинг уйида уч кишининг жасади аниқланди: булар 53 ёшли эркак ҳамда 52 ва 21 ёшлардаги аёллардир. Полша полициясига кўра, жасадлар жиноятчининг ота-онаси ва синглисига тегишли. У кўчага чиқишдан олдин оила аъзоларини ҳам отиб ташлаган.
Жасадлар Краковдан тахминан 200 километр масофадаги Островец-Свентокшиски шаҳридаги уйда топилган.
Шахсий маълумотлари ҳозирча эълон қилинмаган 24 ёшли эркак 7 ноябр куни Краковнинг тарихий қисмида автомобилда ҳаракатланиб, кўчадаги ўткинчиларни ўққа тутганди. Ҳужум оқибатида олти киши ҳалок бўлиб, 16 киши жароҳат олган. Жабрланганлар орасида уни таъқиб этиб, зарарсизлантирган икки полициячи ҳам бор. Полиция билан отишмадан кейин ҳужумчи қўлга олинган ва оғир аҳволда шифохонага олиб кетилган.
Жиноятчининг мотивлари ҳозирча номаълум. Полша ички ишлар вазири Марчин Кервинскийнинг маълум қилишича, қўлга олинган шахс «ўта радикал», «ултрамиллатчи» қарашларга эга бўлган.
Мамлакат бош вазири Доналд Туск Краковдаги ҳодисани теракт деб баҳолаган.
Мамлакатда қурбонлар хотирасига мотам эълон қилинган.
