УЕФА ва унга аъзо 55 та миллий футбол федерацияси жаҳон чемпионати ҳуқуқларини хусусий инвесторларга сотиш режасидан воз кечилмагунча ФИФА шафеълигидаги барча мусобақаларни бойкот қилади, дейилади ташкилот сайтида эълон қилинган баёнотда.
«Ушбу таклифлар ўз кучида қолар экан, бирорта ҳам миллий жамоа ФИФАнинг ҳеч қайси мусобақасида иштирок этмайди», — дейилади баёнотда.
Баёнотда айтилишича, жаҳон чемпионатига инвестициявий маҳсулот деб қарамаслик керак.
«Бу футболнинг энг буюк спорт меросларидан бири. У барча қитъаларнинг футболчилар авлодлари, миллий жамоалари ва мухлислари томонидан яратилган. Унинг бирорта ҳам қисми ҳеч қачон хусусий инвесторларга берилмаслиги шарт. Жаҳон чемпионати сотилмайди», дейилади УЕФА баёнотида.
ФИФА президенти Жанни Инфантино жаҳон чемпионатидаги улушнинг бир қисмини сотишни режалаштираётгани ҳақида бир неча кун аввал маълум бўлганди. Эҳтимолий харидор — Доналд Трампнинг куёви Жаред Кушнернинг укаси Жошуа Кушнер бошчилигидаги инвесторлар гуруҳи. Маълумотларга кўра, ушбу режа бўйича АҚШ президенти маъмуриятига маслаҳатлар берилган, жараён билан JP Morgan шуғулланмоқда. Қитъа конфедерациялари раҳбарлари эса бу ҳақда оммавий ахборот воситалари орқали хабар топишди.
Кейинроқ Sky News Инфантино ФИФАга аъзо ассоциацияларга мактуб юбориб, уларга бу режани қўллаб-қувватлаш учун 19 сентябрга қадар муҳлат берганини, режа қабул қилиниши учун рағбат сифатида 40 миллион АҚШ доллари таклиф қилгани ҳақида хабар берди. Инфантино ассоциацияларни агар улар бу режани қўллаб-қувватламайдиган бўлса, ривожланиш лойиҳалари, оммавий футбол ва миллий жамоалар учун маблағлар анчагина камайиши ҳақида огоҳлантирган.
УЕФА мазкур қарорни кескин танқид қилди. Европа футбол уюшмасига кўра, «ФИФА тақиқланган чегарадан чиқмоқда» ҳамда футболдан «ўзи ва дўстларини бойитиш воситаси сифатида» фойдаланишни давом эттира олмайди.
The Times нашрининг ёзишича, Осиё футбол конфедерацияси президенти шайх Салмон конфедерациянинг 47 аъзосига йўллаган мактубида ФИФА томонидан маслаҳатлашувлар бўлмагани учун «чуқур хавотир ва таассуф билдирган. Шимолий ва Марказий Америка ҳамда Кариб ҳавзасининг 41 мамлакати аъзо бўлган КОНКАКАФ ҳам бу режага танқидий ёндашган.
