АҚШнинг Калифорния штатидаги Монтерей шаҳрида ўтган автомобил ҳафталиги доирасида Land Rover 2026 йилги «Дакар» раллисида ғолиб чиққан D7X-R пойга машинасининг умумий йўлларга мўлжалланган версияси – янги Defender Dakar’ни тақдим этди. Ушбу модел бренднинг моделлар қаторидаги энг экстремал ва қудратли Defender бўлиб, унда пойга автомобилига хос бир қатор ечимлар қўлланилади.
Капот остига 626 от кучи ва 750 Нм айланма моментга эга 4,4 литрли, қўш турбокомпрессорли V8 бензин двигатели ўрнатилган. Қуввати бўйича у ҳатто пойгачи D7X-R’дан ҳам устун туради, бироқ ундан фарқли ўлароқ, Defender Dakar умумий фойдаланишдаги йўлларда ҳаракатланиш учун мўлжалланган.
Асосий ўзгаришлар шассига киритилди. «Пневмоподвеска» ўрнига бу ерга йўлтанламасда тез юришга мослаштирилган Bilstein пружиналари ва амортизаторлари ўрнатилган, 35 дюймли йўлтанламас шиналари эса 20 дюймли зарбланган дискларга ўрнатилган.
Автомобилга ралли учун мўлжалланган Defender’дан қум ва шағалда ҳаракатланиш учун махсус режимлар ҳамда ғайриоддий «парвоз режими» ўтган. Бу режим сакрашдан сўнг, ерга тушиш пайтида «подвеска»нинг ишлашини махсус созлаб, ҳайдовчига қарийб уч тонналик йўлтанламасни ҳақиқий парвозга «йўналтириш» имконини беради.
Ташқи кўриниши ҳам пойга автомобилини имкон қадар ёдга солади: карбон капот, қўшимча ҳаво ютгичлар, томдаги фонарлар ва Dakar’нинг ўзига хос ранглари. Салонга спорт ўриндиқлари, тўрт нуқтали хавфсизлик камарлари ўрнатилган ва 2+2 ўриндиқлар схемаси қўлланилган.
Ҳозирча Land Rover фақат эҳтимолий харидорлардан буюртмалар қабул қилмоқда. Нархлар, аниқ адади ва тўлиқ техник тавсифлари 2027 йил январ ойида «Dakar» раллиси пайтида эълон қилинади, шундан сўнг расмий буюртмалар очилади.
