2026 йил 1 август ҳолатига Ўзбекистонда муомаладаги банк карталари сони 75,7 миллион донани ташкил этди. Жорий йилнинг 1 январь ҳолатига бу кўрсаткич 68,3 миллионта эди.
Шу тариқа, етти ой давомида муомалага қўшимча 7,4 миллионта банк картаси чиқарилди. Карталарнинг умумий сони йил бошига нисбатан 10,9 фоизга кўпайди.
Тўлов инфратузилмаси ҳам кенгайишда давом этмоқда. Хусусан, ўрнатилган тўлов терминаллари сони 430,8 мингтадан 453,5 мингтага етди. Етти ой ичида қўшимча 22,7 мингта терминал ишга туширилиб, уларнинг сони 5,3 фоизга ошди.
Банкомат ва инфокиосклар тармоғида ўсиш янада юқори бўлди. Йил бошида уларнинг сони 40,1 мингтани ташкил этган бўлса, 1 августга келиб 47 мингтага етди. Бу 17,3 фоизлик ўсишни англатади.
Шу билан бирга, тўлов терминаллари орқали амалга оширилаётган операциялар ҳажми сезиларли даражада ошган. 2026 йилнинг январ–июл ойларида терминаллар орқали тушган тушумлар 387,4 трлн сўмни ташкил қилди.
Таққослаш учун, 2025 йилнинг тўлиқ 12 ойи давомида тўлов терминаллари орқали 460,3 трлн сўм тушум қайд этилган эди. Демак, жорий йилнинг дастлабки етти ойидаёқ ўтган йилги йиллик кўрсаткичнинг қарийб 84 фоизига тенг айланма шаклланган.
Айни пайтда карталар сони 10,9 фоизга кўпайган бўлса, терминаллар орқали айланма 44,3 фоизга ўсган. Бу банк карталаридан фойдаланиш фаоллиги ҳам ортиб бораётганини кўрсатади.
Хусусан, битта банк картасига тўғри келадиган ўртача ойлик тушум 562 минг сўмдан 731 минг сўмгача ошган. Бу кўрсаткич нақд пулсиз ҳисоб-китоблар аҳолининг кундалик харид ва тўловларида тобора кенгроқ ўрин эгаллаётганини кўрсатади.
