Gas Infrastructure Europe маълумотларига кўра, 19 август ҳолатида Германиядаги 40 дан ортиқ ерости табиий газ омборларининг тўлдирилганлик даражаси 50,14 фоизни ташкил этган.
Бу август ойи ўрталари учун сўнгги бир неча йилдаги энг паст кўрсаткичдир. Германиядаги газ захиралари ўтган йилнинг шу даврига нисбатан тахминан чоракка кам. 2023 ва 2024 йиллардаги кўрсаткичлар билан таққослаганда эса фарқ 45 фоиз пунктдан зиёдни ташкил этмоқда.
Шунга қарамай, Германия ҳукумати мамлакат истеъмолчилари қишда газ танқислигига дуч келмаслигини билдирмоқда.
Нега газ омборлари кам тўлдирилган?
Одатда энергетика трейдерлари ёзда газни нисбатан арзон нархларда сотиб олиб, уни омборларда қишгача сақлайди. Совуқ мавсумда талаб ва нархлар ошгач, газ қимматроқ сотилади. Бу бозорда «ёз-қиш нарх спреди» деб аталади.
Бироқ бу йил вазият бошқача. Эрондаги уруш билан боғлиқ етказиб беришдаги узилишлар табиий ва суюлтирилган табиий газнинг жаҳон бозоридаги нархларини оширган. Шу сабабли трейдерларда омборларни ҳозирги юқори нархларда газ билан тўлдириш учун иқтисодий рағбат камайган.
20 август куни Нидерландиянинг TTF биржасида газнинг улгуржи нархи бир мегаватт-соат учун қарийб 65 еврони ташкил этган. Бу ўтган йилнинг шу даврига нисбатан тахминан икки баравар юқори.
АҚШ ва Эрон ўртасидаги можаро қайта кучайиши фонида сўнгги икки ҳафтанинг ўзида TTF индекси қарийб 25 фоизга кўтарилган.
Трейдерлар нарх тушишини кутмоқда
Европанинг айрим давлатларидан фарқли равишда, Германия газ омборларини тўлдиришда асосан хусусий энергетика савдо компанияларига таянади.
Бозор иштирокчилари Эрондаги уруш якунланса, яқин ойларда газ нархлари пасайиши мумкин, деган ҳисоб-китоб билан ҳозирча катта ҳажмда газ сотиб олишга шошилмаяпти. Нарх пасайгандан кейин газ харид қилиш улар учун иқтисодий жиҳатдан манфаатлироқ бўлади.
Бироқ бундай ёндашув Германияда танқидларга ҳам сабаб бўлмоқда. Айрим сиёсатчилар трейдерларни мамлакат энергетик хавфсизлигини таваккал остига қўяётганликда айблаган.
19 август куни Германия Иқтисодиёт вазирлиги ҳам газ омборлари операторларини захираларни кўпайтиришга чақирган.
