АҚШ маъмурияти бошпана сўраб мурожаат қилган 200 минг нафар хорижликнинг визасини бекор қилишга тайёргарлик кўряпти, дея хабар берди Associated Press.
Агар бу амалга ошса, Қўшма Штатлар тарихидаги энг йирик бир марталик оммавий визаларни бекор қилиш жараёни бўлади.
Яқин кунларда Давлат департаменти 2016 йилдан 2026 йилгача бўлган даврда берилган B1 ва B2 тоифасидаги визалар бекор қилинишини эълон қилиши кутиляпти. Ушбу қарор суд даъволарига йўл очиши ва жиддий юридик тўсиқларга дуч келиши тахмин қилиняпти.
Маълумот учун, B1 — бизнес визаси. АҚШга бизнес учрашувлари, конференциялар, музокаралар, шартнома тузиш каби вақтинчалик бизнес мақсадларида бориш учун берилади. B2 эса — туристик виза. Саёҳат, дам олиш, қариндош ёки дўстларни кўриш, шунингдек айрим тиббий муолажалар учун тақдим этилади.
«АҚШга қисқа муддатли саёҳат билан келганини даъво қилиб, кейинчалик доимий яшаш учун бошпана сўраб ариза топширган хорижликларнинг ноиммиграцион визаларини аниқлаш ва бекор қилиш» бўйича Ички хавфсизлик вазирлиги билан ҳаракатларимизни мувофиқлаштиряпмиз», дея таъкидлаган Давлат департаменти матбуот котиби Томми Пиготт.
Қайд этилишича, визаларнинг бекор қилиниши дарҳол депортация қилинишни англатмайди. Ҳозирда бошпана бериш тўғрисидаги ишлари кўриб чиқилаётган шахсларнинг аксарияти бошқа тоифага ўтказилади ва ўзларининг ишбилармон ёки сайёҳ мақомини йўқотади.
