Россиянинг «Лукойл» компаниясига тегишли тўртта нефтни қайта ишлаш заводидан учтаси дрон зарбалари оқибатида ишини тўхтатган. Бу ҳақда 26 август куни Reuters агентлиги учта манбага таяниб хабар берди.

Нижний Новгород вилоятининг Кстово шаҳридаги объектларга тунги ҳужумдан кейин «Лукойл-Нижегороднефтеоргсинтез» заводи ҳам фаолиятини тўхтатган. У Россияда нефтни қайта ишлаш ҳажми бўйича тўртинчи йирик завод, бензин ишлаб чиқариш бўйича эса иккинчи ўринда туради.

Корхона йилига қарийб 15 млн тонна нефтни қайта ишлаш ва тахминан 5 млн тонна бензин ишлаб чиқариш қувватига эга.

Reuters манбасининг маълум қилишича, дронлар ҳужуми оқибатида заводдаги бир нечта технологик қурилма, цехлараро коммуникациялар ҳамда умумзавод объектлари шикастланган. Шу сабабли корхона фаолияти вақтинча тўхтатилган. Заводни таъмирлаш ва ишлаб чиқаришни қайта йўлга қўйиш учун қанча вақт талаб қилиниши ҳозирча маълум эмас.

Кстоводаги заводдан ташқари, «Лукойл»нинг Волгограддаги нефтни қайта ишлаш корхонаси ҳам 31 июлга ўтар кечаси содир бўлган ҳужумдан кейин ишини тўхтатишга мажбур бўлган эди.

Компаниянинг Пермдаги НҚЗ эса 21 августга ўтар кечаси амалга оширилган ҳужумдан кейин фаолиятини тўхтатган.

Шу тариқа, айни пайтда «Лукойл»нинг Россиядаги тўртта нефтни қайта ишлаш заводидан фақат биттаси — «Лукойл-Ухтанефтепереработка» ишлашда давом этмоқда.

Украина Қуролли кучлари Россиянинг турли ҳудудларидаги нефтни қайта ишлаш объектларига мунтазам равишда дронлар билан зарба бермоқда.

Жумладан, 25 августга ўтар кечаси Ростов вилоятидаги объектларга ҳужумлардан кейин маҳаллий ҳокимият Новошахтинск шаҳридаги нефтни қайта ишлаш корхонасига зарар етганини маълум қилди. Оқибатда ушбу завод ҳам ишини тўхтатишга мажбур бўлган.

Бундан ташқари, июл ойи охиридаги ҳужумдан кейин Тюмендаги нефтни қайта ишлаш заводи ҳам вақтинча фаолиятини тўхтатган эди. Reuters манбаларига кўра, зарба натижасида корхонада дизел ёнилғисини гидротозалаш қурилмасида ёнғин чиққан.

Шунингдек, юқори октанли бензин ишлаб чиқаришга мўлжалланган комплекс қурилма ҳам ишдан чиққан бўлиши мумкинлиги хабар қилинган.