Германия ҳукумати Лейпциг аэропортида Украинанинг Ан-124 юк самолётига қарши қўпорувчилик ҳаракатига уриниш учун масъулиятни расман Россия зиммасига юклади. Матбуот анжуманида Берлиннинг позициясини Ички ишлар вазирлиги раҳбари Александр Добриндт ва Ташқи ишлар вазирлиги раҳбари Йоҳанн Вадефул таништирди.
Добриндт сўзларига кўра, полиция тергови натижалари, воқеанинг “ўзига хос жиҳатлари”, шунингдек, разведка маълумотлари “Россиянинг режалаштирилган, амалга оширилган ва олди олинган гибрид ҳаракатларга алоқадорлигини яққол кўрсатиб турибди”.
Вадефул жавоб чоралари ҳақида маълум қилди: Германия Россиянинг Бонндаги Бош консуллигини ва Берлиндаги “Русский дом”ни ёпади. Россия элчиси мамлакат Ташқи ишлар вазирлигига чақиртирилади. Бундан ташқари, Германия ҳукумати Россия фуқароларининг мамлакатга кириши устидан назоратни кучайтиради. Бунинг айнан қандай амалга оширилиши ҳозирча аниқлаштирилмаган.
Еврокомиссия раҳбари Урсула фон дер Ляйен ўз навбатида Европа Иттифоқи “Россия томонидан уюштирилган ушбу ҳужум қаршисида Германия билан тўлиқ бирдам” эканини таъкидлади. У бу масалани НАТО Бош котиби Марк Рютте билан муҳокама қилишга ваъда берди, шунингдек, Европа Иттифоқи мамлакатлари ташқи ишлар вазирлари қўшимча санкциялар тайёрлаш билан шуғулланишини маълум қилди.
Рюттенинг ўзи “[Россия Федерациясининг қўпорувчиликка алоқадорлиги] далиллари шубҳасиз” эканини айтди. “Мен Германиянинг жавоб чораларини олқишлайман”, — деб таъкидлади у. Шунингдек, Финландия президенти Александр Стубб, Полша бош вазири Доналд Туск, Латвия ТИВ ва Европа Иттифоқининг бошқа мамлакатлари вакиллари ҳам Берлиннинг ҳаракатларини қўллаб-қувватлашини ҳамда Украинага Россия билан урушда ёрдам беришда давом этишга тайёр эканини билдирди.
Россия ТИВ вакили Мария Захарова Германия ҳукуматининг ҳаракатларини танқид қилди. “Баҳона ўйлаб топишибди. Ваҳоланки, Берлиннинг ўзи Украина можаросини авж олдиришда ҳам, тинч аҳолига қарши терактларда қатнашишда ҳам тўлиқ булғанган”, — деди у. Захарова, шунингдек, “Русский дом” анча вақтдан бери Германия ҳукуматига “тинчлик бермай келаётгани” ҳақидаги фикрини билдириб, Россия уни ёпиш тўғрисидаги қарорга “албатта жавоб қайтаришини” ваъда қилди.
5 августга ўтар кечаси Лейпциг аэропортида портловчи модда бириктирилган дрон топилди. Дрон бортида ўқ-дорилар бўлган Украинанинг Ан-124 транспорт самолёти яқинида турган эди. Кейинчалик маълум бўлишича, дронлар бир нечта бўлган: яна бири 10 кундан сўнг аэропортнинг ғарбида топилган, ОАВ ёзишича, яна бири эса юк самолёти билан тўқнашган бўлиши мумкин, бироқ бу дроннинг ҳеч қандай изи топилмаган.
