Дэниел Дрисколл АҚШ Қуролли кучларини ривожлантириш йўналиши ва қатор юқори мартабали офицерларни лавозимдан озод этиш масалаларида мудофаа вазири Пит Ҳегсет билан бир неча ой давомида келишмовчиликларга борган. Бу ҳақда The Wall Street Journal манбаларига таяниб хабар берди. Кейинчалик Reuters ва AP ҳам ушбу маълумотни тарқатди.
NBC News манбалари эса Оқ уй Дрисколлнинг истеъфосини қабул қилганини хабар қилди. The Wall Street Journal маълумотига кўра, у яқин кунларда Пентагондаги лавозимини тарк этиши кутилмоқда.
Оқ уй матбуот котибининг биринчи ўринбосари Анна Келли Дрисколл АҚШ Қуруқлик қўшинлари вазирлигида Доналд Трамп маъмурияти дастурини амалга оширишда самарали ишлаганини билдирган.
Унинг таъкидлашича, Дрисколл ҳарбий тайёргарлик ва қуролларнинг жанговар самарадорлигига устувор аҳамият берган, шунингдек, Россия ва Украина ўртасидаги музокараларга кўмаклашган.
Дрисколлнинг истеъфога чиқиши мумкинлиги ҳақидаги хабарлар аввалроқ ҳам тарқалган эди. The Wall Street Journal 21 август куни у Пит Ҳегсет билан келишмовчиликлар туфайли йил охирига қадар лавозимини тарк этишни режалаштираётгани ҳақида ёзган.
Reuters баҳосига кўра, Дрисколлнинг кетиши Доналд Трампнинг иккинчи президентлик муддати даврида Пентагон раҳбариятининг турли бўғинларида амалга оширилаётган кадрлар алмашинувининг навбатдаги босқичи бўлиши мумкин.
Жумладан, жорий йил апрел ойида АҚШ Қуруқлик қўшинлари штаби бошлиғи Рэнди Жорж ҳамда қатор бошқа юқори мартабали ҳарбий амалдорлар лавозимидан озод этилган эди.
Дэниел Дрисколл АҚШ вице-президенти Жей Ди Вэнснинг дўсти ва собиқ курсдоши ҳисобланади. У 2025 йил ноябрида Кит Келлог ўрнига Доналд Трампнинг Украина бўйича махсус вакили этиб тайинланган.
Дрисколл АҚШ Қуруқлик қўшинлари вазири лавозимини 2025 йил феврал ойидан буён эгаллаб келаётган эди. Reuters қайд этишича, у бу лавозимда армияни қуроллантиришда «мослашувчан ёндашув» тарафдори бўлиб, нисбатан арзон қурол-яроғ харид қилишни қўллаб-қувватлаган ва йирик қурол ишлаб чиқарувчиларни танқид қилиб келган.
