DW хабарига кўра, учрашув 29 сентябр куни Вашингтондаги Оқ уйда бўлиб ўтган. Унда Google, Anthropic, Meta, OpenAI, Nvidia ҳамда Илон Маскка тегишли xAI компаниялари раҳбарлари иштирок этган. Манбада қайд этилишича, xAI йил бошида Маскнинг космик компанияси — SpaceX билан бирлашган.
Музокаралар якунида сунъий интеллект ривожи устидан назоратни кучайтириш бўйича қўшма келишув имзоланган. Трамп ҳужжатни ўзининг Truth Social ижтимоий тармоғида эълон қилган.
Келишувга мувофиқ, ҳар бир компания ўз сунъий интеллект моделларининг имкониятларини кузатиш ва хавфсизлик стандартларига мувофиқлигини текшириш учун «ишончли ички механизмлар» яратиши керак. Бундай назорат моделларни ўқитиш ва амалиётга жорий этиш босқичларини қамраб олиши назарда тутилган.
Асосий эътибор киберхавфсизлик, биологик ва кимёвий хавфсизлик билан боғлиқ йўналишларга қаратилади. Текширувлар давомида аниқланган хавф ва муаммолар бартараф этилиши лозим.
Шунингдек, IT-компаниялардан мустақил аудиторлар билан ҳамкорлик қилиш ҳамда сунъий интеллект тизимлари хавфсизлигини оширишга хизмат қилувчи стандарт ва усулларни ишлаб чиқиш бўйича қўшма учрашувларда мунтазам қатнашиш кутилмоқда.
Трамп келишув «маънавий кучга» эга эканини, аммо унинг бажарилишини суд тартибида мажбуран таъминлаш мумкин эмаслигини айтган. Шу билан бирга, ҳужжатда вақт ўтиши билан мазкур чораларни қонунлар ёки меъёрий ҳужжатларда мустаҳкамлаш зарурати пайдо бўлиши мумкинлиги қайд этилган.
Трамп сунъий интеллект ривожини қўллаб-қувватламоқда
АҚШ президенти 19 сентябр куни сунъий интеллект масалалари билан шуғулланадиган махсус тузилма — «сунъий интеллект кучлари» яқин орада ташкил этилишини эълон қилган эди.
Трамп ушбу технология ривожига тўсқинлик қилиш ниятида эмаслигини билдириб, унинг жорий этилишини «навбатдаги саноат инқилоби» деб атаган. Оқ уй раҳбари АҚШ сунъий интеллект соҳасида Хитойдан устунлигини сақлаб қолишини хоҳлашини ҳам таъкидлаган.
Компаниялар раҳбарлари нимадан хавотирда?
Айни пайтда, сентябр ойи ўрталарида Claude, ChatGPT ва Gemini тизимларини ишлаб чиққан Anthropic, OpenAI ва Google компаниялари раҳбарлари сунъий интеллект ривожланиш суръатларини секинлаштиришни таклиф қилган.
