Кремл ноябр ойида Россия – АҚШ – Украина форматидаги уч томонлама музокараларни тиклашга тайёр. Бу ҳақда РФ президенти ёрдамчиси Юрий Ушаков Владимир Путин ва Стив Уиткофф ўртасида 21 октябр куни Петербургда бўлиб ўтган учрашувдан кейин маълум қилди.
«Президент Стив Уиткоффга юқорида тилга олинган уч томонлама музокараларни ноябр ойининг ўнинчи кунларида, асосий мавзу бўйича қайтадан бошлашга тайёр эканимизни маълум қилди. Бу мавзу можаро тугаганидан кейин Россия ва Украина учун хавфсизлик тизимини яратиш билан боғлиқ», – деди Ушаков журналистларга.
Унинг сўзларига кўра, Уиткофф учрашувда таклифни қўллаб-қувватлаган ва «бундай қарор президент Трамп томонидан катта мамнуният билан қаршиланишига шубҳа йўқлиги»ни айтган. АҚШ президенти элчисининг ўзи ҳозирча Петербургдаги учрашув якунлари бўйича изоҳ бермади.
Шу билан бирга, Ушаков Уиткофф Путин билан учрашувда Европа Иттифоқи ва Киевнинг «янги ёндашувлари» ҳақида гапиргани, бироқ «уларда Украина инқирозини ҳал қилиш нуқтайи назаридан фойдали нарсалар унчалик кўп бўлмагани»ни қўшимча қилган.
«Билмадим, биз қанчалик яқинмиз, аммо иш шунга қараб бормоқда», – деган Россия президенти ёрдамчиси «Вести» мухбирининг можарони якунлаш истиқболлари ҳақидаги саволига жавобан.
У шунингдек Россия, АҚШ ва Украина вакилларининг кейинги уч томонлама учрашуви Абу-Дабида бўлиб ўтиши мумкинлигини айтган.
«Биз Абу-Дабини мўлжаллаяпмиз. Ноябрнинг ўрталарида, ноябрнинг ўнинчи кунларига келишилган», – деган у.
Бундан ташқари, Ушаков Владимир Путин, Доналд Трамп ва Си Жинпинг ўртасида APEC саммити доирасида уч томонлама учрашув ўтказилиши мумкинлиги юзасидан муносабат билдириб, бу тарихий воқеа бўлишини айтган.
Ушаковнинг сўзларига кўра, Москва сентябр ойида, Давлат думасига сайловлардан сўнг дарҳол уч томонлама музокараларни қайта тиклашни режалаштирганди, аммо Киевнинг айби билан бу амалга ошмаган – «овоз бериш кунларида Москва ва бошқа шаҳарлар, жумладан, сайлов участкаларига жуда катта зарбалар» берилгани туфайли.
Киев ҳозирча Кремлнинг таклифи юзасидан муносабат билдирмади.
Путин ва Уиткоффнинг учрашуви Стрелна посёлкасидаги Константин саройида, ёпиқ эшиклар ортида бўлиб ўтди. Унда Россия президентининг хорижий мамлакатлар билан инвестициявий-иқтисодий ҳамкорлик бўйича махсус вакили Кирилл Дмитриев ҳам иштирок этди. У чоршанба куни эрталаб Уиткоффни Пулково аэропортида кутиб олди ва учрашувдан сўнг уни кузатиб қўйди.
