DW хабарига кўра, Мерц бу ҳақда 21 октябр куни Берлиндаги Berlin Global Dialogue иқтисодий форумида гапирган.
«Биз Украинани бу урушни чўзиш учун қўллаб-қувватлаётганимиз йўқ. Аммо Украинанинг капитуляцияси, айниқса, сўзсиз таслим бўлишига йўл қўйиб бўлмайди. Чунки бу барчамизнинг таслим бўлишимизни англатади», — деган канцлер. Унинг сўзларини Reuters агентлиги келтирган.
Мерц Россия томонидан тарқатилаётган дезинформация ва гибрид ҳужумларни Германия хавфсизлиги учун энг катта таҳдид деб атаган. У Москвани совуқ уруш тугаганидан кейин шаклланган сиёсий тартибга қарши ҳужум қилишда айблаган.
«Ҳозир мени энг кўп ташвишлантираётган нарса иқтисодиётимиз ҳам, АҚШ ҳам, Хитой ҳам эмас, балки Россиянинг жамиятимизга таъсиридир», — деган Германия ҳукумати раҳбари.
Унинг сўзларига кўра, гап қўпорувчилик ҳаракатлари, алоқа тизимларига гибрид ҳужумлар ва Германиядаги вазиятни беқарорлаштиришга уринишлар ҳақида кетмоқда. Канцлер бундай ҳужумлар ҳар куни содир бўлаётганини, аммо мамлакатда таҳдид кўлами ҳали ҳам етарлича баҳоланмаётганини айтган.
Аввалроқ Украина президенти Володимир Зеленский АҚШ президенти Доналд Трамп маъмуриятининг сўнгги ҳаракатларини Киевни таслим бўлишга ундашга ўхшатган эди.
18 октябр куни Bloomberg агентлигига берган интервюсида Зеленский Украинани капитуляцияга кўндиришга қаратилган қадамлар ташланган, деб ҳисоблашини билдирган. Бироқ у буни америкалик ҳамкорларнинг аниқ мақсади деб аташдан тийилган.
«Америкалик ҳамкорларимиз урушни Украина ҳисобига тезроқ тугатиш мумкин, деб ўйлаётганига ишонгим келмайди. Аммо бу шундай кўринмоқда», — деган Украина президенти.
Трамп эса, ўз навбатида, Зеленскийни урушни тугатишни истамаётганликда айблаб, унга музокараларни бошқа бировга топширишни тавсия қилган.
