«AvtoVAZ» Lada Priora oilasi avtomobillarini ishlab chiqarishni to‘xtatdi. Modelni yig‘ish ishlari oktabrdan avval boshlanmaydi. Bu haqda korxona matbuot xizmatiga asoslanib, sarzone.uz xabar bermoqda.
«Vaziyat juda oddiy, hech qanday g‘ayritabiiylik yo‘q. Zavodning ishlab chiqarish jadvali bozor talablari va dilerlik tarmoqlarining buyurtmalari asosida shakllantiriladi — bu barcha modellarga, xususan, Lada Priora’ga ham taalluqli. Ishlab chiqarishning sentabr oyi rejasi bajarib bo‘lindi», — dedi «AvtoVAZ» vakili.
«Vedomosti» gazetasining o‘z manbalariga asoslanib xabar berishicha, «Priora»larning ishlab chiqarilishini qayta yo‘lga qo‘yish katta so‘roq ostida turibdi. Bu model savdosining juda pastligi va tez orada Lada Vesta’ning sedan versiyasi sotuvga chiqishi bilan bog‘liq.
«Vedomosti» suhbatdoshlarining qayd etishicha, «AvtoVAZ» «Priora»ni cheklangan miqdorda ishlab chiqarish va boshqa korxonalar, masalan, «Chechenavto» tomonidan yig‘ilayotgan modellar uchun ehtiyot qismlar yetkazib berishga tayyor.
Avvalroq Lada Priora’ni ishlab chiqarish jarayoni 2018 yilga qadar davom etishi haqida xabar berilgan edi. Bundan tashqari, model restayling qilinishi ham kutilmoqda edi. Yangilanishdan so‘ng «Priora» Lada XRay va Vesta o‘xshashroq bo‘lishi kerak edi.
Shuningdek, OAVda shu modelni ishlab chiqarish to‘xtatilishi tufayli “AvtoVAZ” 15 ming xodimini qisqartirishni rejalashtirayotgani haqida ma'lumot paydo bo‘lgan edi.