RIA Novosti agentligining fikricha, G‘arb matbuoti go‘yoki “Turkiyaning IShID bilan aloqalarini fosh etgani uchun” Rossiyaga qarshi axborot kampaniyasini boshlab yuborgan. Rossiyaning bunday iddaolari isbot-dalilini topmagan bo‘lishiga qaramay, darhaqiqat, oxirgi paytlarda Yevropa va Amerika gazetalarida, onlayn nashrlarida va ayrim telekanallarida Moskvaning xatti-harakatlariga bag‘ishlangan materiallar berib borilmoqda.
Xususan, AQShning The Washington Post va The New York Times gazetalari Rossiya “Moskva va Anqara kurashidagi to‘lovni oshirmoqda”, degan fikrga kelishdi. “RF mudofaa vaziri o‘rinbosari Anatoliy Antonov IShID bilan neft oldi-sotdisida shaxsan Erdo‘g‘an ishtirok etgani borasida birorta konkret dalil keltirmadi”, - deb yozadi nashr.
Voice of America AQSh Davlat departamenti matbuot kotibi Mark Tonerning so‘zlarini keltirdi: “Biz buning rostligiga ishonmaymiz”.
Bloomberg Moskvaning so‘zlarini “siyosiy ayblovlardan boshqa narsa emas”, deb baholagan bo‘lsa, The Financial Times Rossiyaning Turkiyaga qarshi harakatlarini “g‘azab natijasi” deb hisobladi. USA Today esa bo‘layotgan ishlarni “Anqara va Moskva o‘rtasidagi dahanaki jang” deb sanadi.
Nihoyat, Buyuk Britaniyaning Guardian nashri “Turkiya balki Rossiya uchun AQShning o‘rnini egallab, birinchi raqamli dushmanga aylanar”, degan fikrni berdi.