16:43 / 13.03.2016
2212

«Real» dekabr oyida Kanteni yetarlicha mashhur emasligi uchun sotib olishga rozi bo‘lmagan

«Real» jamoasi skautlari o‘tgan yilning dekabr oyida jamoa rahbariyatiga joriy mavsumda APL kashfiyotlaridan biriga aylangan, «Lester» jamoasining yosh yarim himoyachisi N'Golo Kanteni sotib olishni taklif qilishgan.

Tahlilchilarning fikricha, jamoaning hujum uchligi ortida ularni butun o‘yin davomida qo‘llab-quvvatlab turadigan, o‘yin davomida 13 km masofa bosib o‘ta oladigan jismonan yetuk yarim himoyachi yetishmayapti. Ayni vaqtda bu vazifani bajarishi kerak bo‘lgan Modrich va Kroos esa o‘yin davomida toliqib qolishmoqda.

El Pais nashrida yozilishicha, Kantedan tashqari skautlar madridliklar rahbariyatiga bundesligada muvaffaqiyatli mavsum o‘tkazayotgan «Gerta» jamoasi xavbeki Vladimir Daridani ham taklif qilishgan.

Xabar qilinishicha, madridliklar menejmenti bu qishki transferlar vaqtida bu futbolchilarni ular yetarli darajada mashhur bo‘lishmagani uchun sotib olmaslikka qaror qilgan.

Ma'lumot uchun, 24 yoshli fransiyalik N'Golo Kante joriy mavsumda «Lester»ning asosiy futbolchisi bo‘lmoqda. Tayanch yarim himoyachisi sifatida harakatlanayotgan bu futbolchi o‘z ampluasida tengsiz bo‘lib turibdi. U 28 o‘yinda 1 gol urgan va 3 marta sheriklarini golli uzatma bilan ta'minlagan.

Bundan oldinroq, ushbu futbolchi uchun «Arsenal» va «Chelsi» tomonidan qiziqish mavjudligi haqida xabar qilingandi. Uning jamoa bilan shartnomasi 2019 yilgacha tuzilgan, taxminiy transfer summasi 20 mln funtni tashkil etadi.

Top