O‘zbekiston-Germaniya: 2016 yilning birinchi yarmida tovar ayirboshlash hajmi 304,4 million dollarni tashkil etdi 

Toshkent shahrida 23 sentabr kuni “O‘zbekistonda Germaniya iqtisodiyoti kuni” mavzusida tadbir bo‘lib o‘tdi. Bu haqda O‘zA xabar bermoqda.

O‘zbekiston Respublikasi Savdo-sanoat palatasi raisi Alisher Shayxov, Germaniya Federativ Respublikasining O‘zbekistondagi Favqulodda va muxtor elchisi Naytxart Xyofer-Vissing, O‘zbekistondagi Germaniya iqtisodiyoti klubi prezidenti, “Commerzbank AG” vakolatxonasi rahbari Bodo Tyons va boshqalar mamlakatlarimiz o‘rtasidagi hamkorlik barcha sohalarda izchil rivojlanib borayotgani, ushbu anjuman savdo-iqtisodiy va sarmoyaviy aloqalarni yanada faollashtirishga xizmat qilishini alohida ta'kidladi. 

Mamlakatlar o‘rtasidagi tovar ayirboshlash hajmi 2015 yilda 521,5 million, joriy yilning yanvar-iyul oylarida esa 304,4 million dollarni tashkil etdi. O‘zbekistonda germaniyalik sarmoyadorlar ishtirokida tuzilgan 112 korxona faoliyat ko‘rsatmoqda. Ular savdo, yengil sanoat, tibbiyot, farmatsevtika, qishloq xo‘jaligi mahsulotlarini qayta ishlash, avtomobilsozlik, transport va transport kommunikatsiyalari, fan-ta'lim kabi sohalarda ish yuritmoqda.

O‘zbekistonda korporativ boshqaruvning samarador usullarini joriy etishda rivojlangan davlatlar, xususan, Germaniya tajribasi o‘rganilmoqda.  Germaniyaning “Daimler”, “Siemens”, “BMW”, “Lufthansa”, “Thyssen Krupp”, “MAN”, “Knauf” singari 25 yetakchi kompaniyasi tashabbusi bilan 2002 yilda asos solingan Yevropa menejment va texnologiyalar maktabi bilan hamkorlik bu borada muhim rol o‘ynamoqda.

Anjumanda ikki mamlakat o‘rtasida savdo-iqtisodiy hamkorlikni, jumladan, sarmoya, energetika, mashinasozlik, korporativ boshqaruv, bank-moliya, eksport-import kabi soha va yo‘nalishlardagi aloqalarni yanada rivojlantirish, Germaniya kompaniyalarini mamlakatimizdagi xususiylashtirish jarayoniga keng jalb etishga oid masalalar atroflicha muhokama qilindi.