Zargarlik savdosi yig‘imlari bevosita davlat byudjyetiga tushadi

O‘zbekiston Prezidentining 2016 yil 23 sentabrdagi PQ–2610 sonli qarori bilan alkogolli ichimliklar, qimmatbaho metallar va toshlardan yasalgan buyumlarni chakana savdo bilan shug‘ullanish huquqidan olinuvchi yig‘imlar tartibiga o‘zgartirishlar kiritildi. 

Avvalgi belgilangan me'yorga ko‘ra, mazkur yig‘imlar yagona hisob raqamiga tushib, so‘ngra undan quyidagi usulda taqsimlanar edi: 

Alkogolli mahsulotlardan olinadigan yig‘imlar – davlat byudjyeti va tadbirkorlik subektlariga davlat xizmatlarini ko‘rsatish "yagona oyna" markaziga;

Qimmatbaho metallar va qimmatbaho toshlardan yasalgan buyumlardan tushadigan yig‘imlar – davlat byudjyeti va shahar va tumanlar hokimiyatlaridagi byudjyetdan tashqari hisob raqamlariga, Toshkent shahrida esa – byudjyet va shahar savdo, xizmat ko‘rsatish va xalq iste'moli mollarini ishlab chiqarish Departamentiga taqsimlanar edi.

Endilikda, alkogolli mahsulotlarni chakana savdo huquqi, umumovqatlanish xizmatini ko‘rsatuvchi korxonalardagi alkogolli ichimliklar savdosidan olinadigan yig‘imlar davlat byudjyeti va tadbirkorlik subektlariga davlat xizmatlarini ko‘rsatish "yagona oyna" markaziga, Toshkent shahrida – byudjyet va shahar savdo, xizmat ko‘rsatish va xalq iste'moli mollarini ishlab chiqarish Departamentiga taqsimlanadi. Bunda, uning tartibi Moliya vazirligi tomonidan belgilanadi. 

Qimmatbaho metallar va qimmatbaho toshlardan yasalgan buyumlardan tushadigan yig‘imlar bevosita davlat byudjyeti hisobiga o‘tkaziladi, deb xabar qilmoqda Norma.uz sayti.