Adliya vazirligi davlat byudjyetini tuzish va ijro etish qoidalariga o‘zgartirish va qo‘shimchalar kiritish to‘g‘risidagi idoraviy hujjatni davlat ro‘yxatidan o‘tkazdi. Yangi normalar Byudjyet kodeksiga kiritilgan o‘zgartishlar asosida ishlab chiqilgan.
Unga ko‘ra, byudjyet so‘rovlarida asossiz yoki samaradorligi past deb topilgan xarajatlar qisqartiriladi. Bu haqda bildirishnoma olgan tashkilotlar uch ish kuni ichida yangilangan byudjyet so‘rovini taqdim etishi shart.
Shuningdek, mahalliy davlat hokimiyati vakillik organlarining mahalliy byudjyetlarni rejalashtirishdagi roli kuchaytirildi. Ular daromadlar prognozi, xarajatlarning dastlabki hajmi hamda byudjyetlararo transfertlar bo‘yicha takliflarni shakllantirishda ishtirok etadi.
Yangi tartibga muvofiq, byudjyet mablag‘larini taqsimlovchilarning rivojlantirish dasturlari kamida uch yillik davr uchun ishlab chiqiladi. Ularda aniq natija ko‘rsatkichlari va kutilgan ijtimoiy-iqtisodiy samaradorlik aks ettirilishi belgilangan.
Bundan tashqari, mahalliy byudjyetlarga byudjyet ssudasi ajratish haqidagi talabnomalar besh ish kuni ichida ko‘rib chiqiladi va qabul qilingan qaror haqida arizachiga bir ish kuni ichida xabar beriladi. Shu bilan birga, davlat moliyasi barqarorligini baholash uchun umumiy fiskal balansni shakllantirish va hisoblash tartibi ham belgilandi.
