DW nashrining AFP agentligiga tayanib xabar berishicha, sammitda tomonlar oʻrtasida keskin bahslar boʻlgan. Tejamkorlik tarafdori boʻlgan davlatlar qatoriga Germaniyadan tashqari Avstriya, Shvetsiya, Daniya, Niderlandiya va Finlandiya ham kirgan.
Yevrokomissiya yozda 2028–2034-yillarga moʻljallangan, qariyb 2 trillion yevrolik byudjet loyihasini taqdim etgan edi. YEI Kengashiga raislik qilayotgan Irlandiya esa uni 140 milliard yevroga qisqartirishni taklif qilgan.
Irlandiya taklifi raqobatbardoshlikni rivojlantirish, ilmiy tadqiqotlar, mudofaa va tashqi siyosat yoʻnalishlaridagi xarajatlarni kamaytirishni nazarda tutadi.
Fransiya byudjetni aʼzo davlatlar badallarini oshirmasdan koʻpaytirish uchun yangi umumevropa yigʻimlarini joriy etishni taklif qilmoqda. Gap raqamli xizmatlar, kriptoaktivlar va internetdagi qimor oʻyinlaridan yigʻim undirish haqida bormoqda.
Germaniya kansleri Fridrix Mers muzokaralar boshlanishidan oldin Yevrokomissiya taklif etgan byudjetni sezilarli darajada qisqartirishga chaqirgan. U qishloq xoʻjaligi hamda hududlar oʻrtasidagi iqtisodiy va ijtimoiy tafovutlarni kamaytirish siyosati uchun qoʻshimcha mablagʻ ajratishga qarshi chiqqan.
YeIga aʼzo koʻplab davlatlar byudjetni 2026-yil oxirigacha tasdiqlashni istamoqda. Ular 2027-yildagi saylovlar natijasida ayrim mamlakatlarda hokimiyatga yevrointegratsiyaga shubha bilan qaraydigan siyosiy kuchlar kelishi kelishuvni qiyinlashtirishi mumkinligidan xavotirda.
Biroq Avstriya kansleri Kristian Shtoker muzokaralar kelasi yilgacha choʻzilishi ehtimolini ham istisno qilmagan.
