Andijon shahrida muhtasham “O‘zbegim” savdo va xizmat ko‘rsatish markazi ish boshladi

Yurtimizda amalga oshirilayotgan izchil islohotlar samaralarini bugun biz turmushimiz farovonligida, keng ko‘lamdagi qurilish va obodonchilik ishlari misolida ko‘rishimiz mumkin. 

Mamlakatimizda xususiy sektor rivojlanishi yo‘lidagi sayi- harakatlari natijasida ko‘plab ijobiy ishlar amalga oshirilmoqda.
Bugun Andijon shahrida zamonaviy ko‘rinishdagi  “O‘zbegim” savdo markazining ochilish marosimi bo‘lib o‘tdi. Tadbirga jamoatchilik va aholi vakillari tashrif buyurdilar. Unda so‘z olgan Andijon viloyati hokimi Shuhratbek Abdurahmonov mamlakatimizning barcha joylarida bo‘lgani kabi viloyatda olib borilayotgan keng ko‘lamli bunyodkorlik ishlari, tadbirkorlik sohasiga berilayotgan imkoniyatlar  haqida so‘zlab, barchani muhtasham savdo va ko‘ngilochar markazning ochilishi bilan qutladi. 

Mazkur inshootda qisqa muddatlarda barcha qulayliklarni o‘zida mujassam etgan holda barcha zaruriy savdo va xizmat ko‘rsatish kompleksi tashkil qilindi.  
Markazda bir vaqtning o‘zida 4000 kishini qamrab olish imkoniyati mavjud.  Jumladan, ushbu inshootda 320 dan ortiq yangi ish o‘rinlari yaratilib, kompleksda xar xil xizmat turdagi restoran va kafelar, eng oxirgi texnologiya asosida 3 ta kinoteatr zallari, zamonaviy bolalar o‘yingohi, 3 turdagi (oziq-ovqat, kiyim-kechak, maishiy buyumlar) savdo majmualari tashkil qilingan.

Mehmonlar majmuada aholi uchun yaratilgan sharoitlar bilan tanishdilar.

Elmurod Ermatov, Andijon