AQSh davlat kotibi Alepponi egallash Suriyadagi urushga yakun yasamasligini ma'lum qildi

AQSh davlat kotibi Jon Kerri Alepponi Suriya hukumat kuchlari tomonidan egallanishi mamlakatdagi urushga yakun yasamasligini ma'lum qildi. U bu haqda Berlinda “GFR oldidagi xizmatlar uchun” oliy mukofotini olish marosimida so‘zga chiqib, aytib o‘tgan.

«Hamma Suriyadagi vaziyatni harbiy yo‘l bilan hal qilib bo‘lmasligini aytmoqda. Ha, bu to‘g‘ri. Hattoki Aleppo qo‘lga kiritilsa ham bu urushga yakun yasamaydi. Oxir-oqibat Rossiya, Asad, eronliklar va boshqalar bu yerda fanatik va boshqa oqim hamda manfaatlar borligini, ularni mojaro tugashi uchun hal qilish lozimligini tushunib yetishadi», — deya ma'lum qildi AQSh davlat kotibi.

Uning qo‘shimcha qilishicha, AQSh Suriyada urush tugatilishini albatta istaydi, “sababi biz (AQSh)” bu yerda harbiy yechim yo‘qligini tushunamiz va Aleppo hamda Suriyaning boshqa tumanlaridagi dahshatli qon to‘kilishlari o‘zini hali o‘n yillar davomida eslatib turishi muqarrar”.