«Manchester Yunayted» jamoasi bosh murabbiyi Joze Mourino Yevropa Ligasining guruh bosqichida Luganskning «Zarya» klubiga qarshi kechadigan uchrashuv oldidan batafsil intervyu berdi.
- «Zarya»ga qarshi ilk uchrashuv sizlarga katta qiyinchiliklar tug‘dirgandi. Oldindagi uchrashuv oldidan xavotirlar bormi?
- Ha, «Zarya»ga qarshi o‘z maydonimizdagi birinchi uchrashuv bizga yetarli darajada og‘ir o‘tgandi. O‘shanda raqib ham ancha qiynalgan. Oldindagi o‘yin biz uchun juda muhim. Biz Yevropa Ligasida qolishimiz kerak. Shunga harakat qilamiz. O‘ylaymanki, raqib ham maydonga borini tashlaydi. Bizda dam olish va tayyorlanish uchun faqat bir kun bo‘ldi. Ammo yaxshi o‘yin ko‘rsatishga harakat qilamiz. Bizga g‘alaba juda zarur.
- Sizga qaysi biri muhimroq — Angliya premer-ligasimi yoki Yevropa Ligasi?
- Hamisha navbatdagi o‘yin eng muhimi bo‘ladi. Bugun men sizga Yevropa Ligasi muhim deyman, bu o‘yindan o‘tib olganimizdan keyin premer-liga muhimligini aytaman.
- Birinchi o‘yin vaqtida o‘z yordamchilaringiz bilan ziddiyat yuzaga kelgandi…?
- Bu savolga javob qaytarmayman.
- Vernidub («Zarya» bosh murabbiyi) matbuot anjumanida siz dunyoning eng yaxshi murabbiyi ekaningizni va sizning klubingizda amaliyot o‘tashni istashi haqida aytdi.
- Buni eshitish yoqimli, ammo men o‘zimni eng zo‘r deb bilmayman. Bunday murabbiy yo‘q. Chempionatning eng yaxshi murabbiyi bo‘ladi, ammo dunyoning eng yaxshi murabbiyi bo‘lmaydi. U mendan nimadir o‘rgansa, men ham undan nimadir olaman. Men har bir o‘yinda o‘z hamkasblarimdan qandaydir saboq olaman. Agar ertaga raqib o‘yinida nimadir yangi narsa ko‘rsam, bundan xursand bo‘lardim.
- Sizning jamoangizda vaziyatlarni golga aylantirishdagi salbiy ko‘rsatkichlar sababi nimada? Balki, bu psixologiya bilan bog‘liqdir?
- Yo‘q, bu o‘yinda bo‘ladigan vaziyatlar.
- Siz qo‘riqchilar yollabsiz. Odessa siz uchun shunchalar xavflimi?
- Men hammasi yaxshi bo‘lishini istayman. Yaxshi mehmonxona va yaxshi tushlik so‘radim. Bular eng muhimlari(kuladi). Sizga aniq ma'lumotlar yetkazishmabdi.
- Internetda sizning jamoaningiz o‘yini haqida juda yomon fikrlar bildirilmoqda…
- Hamma o‘z fikrini bayon qilishi mumkin. Biz «Feyyenoord» bilan safar o‘yinida yutishimiz kerak edi, o‘yinda ustunlik qilgandik. «Fenerbahche»da ham g‘alaba qozonishimiz kerak edi, ammo yutqazdik. Biz Yevropa Ligasida qolishimiz uchun ertaga ochko olishimiz kerak.
