Yevrokomissiya Volkswagen ishi bo‘yicha YeIning yetti mamlakatiga nisbatan tekshirish boshladi

Yevropa komissiyasi 9 dekabr kuni Germaniya va YeIning yana olti davlatiga nisbatan tekshiruvlarni boshladi. Bu holat Volkswagen ishi bo‘yicha ro‘y bergan ehtimoliy qonun buzilishlari bilan bog‘liqdir, deb xabar berdi «Interfaks».

Eng asosiy ayblovlar Germaniyaga qo‘yilmoqda. Aynan shu mamlakatda avtokonsernning qarorgohi joylashgan. Yevrokomissiya ma'lumotlariga ko‘ra, GFR hukumati «dizel mojarosi»dan so‘ng hech qanday qo‘shimcha choralarni ko‘rmagan. Shuningdek, komissiyaning fikricha, nemis hukumati ma'lumotlar bilan nayranglarga atayin yo‘l qo‘ygan bo‘lishi ham mumkin.

Germaniyadan tashqari tekshiruvlar Chexiya, Litva, Gretsiya, Lyuksemburg, Ispaniya va Buyuk Britaniyaga nisbatan ham boshlandi.

Germaniya transport vaziri Aleksander Dobrindtning fikricha, mamlakat Volkswagen’ni jazolash masalasida YeI qonunchiligini buzmagan va unga bog‘liq bo‘lgan barcha ishni qilgan.

Ma'lumot uchun, Yevropa qonunlariga ko‘ra, chiqarilgan gazlar miqdorini sun'iy ravishda kamaytiruvchi uskuna yoki dasturiy ta'minotdan foydalanish – qat'iyan taqiqlangan.