PISA xalqaro baholash dasturi oʻquvchilarning matematik bilimlarinigina emas, ularni amaliy vaziyatlarda qoʻllash qobiliyatini ham tekshiradi.
Naked Science nashri Eurostat maʼlumotlariga tayanib yozishicha, 2018-yil bilan taqqoslaganda Yevropaning deyarli barcha mamlakatlarida matematikadan past natija koʻrsatgan oʻquvchilar ulushi oshgan.
Jumladan, Shimoliy Makedoniyada bazaviy darajaga yetmaganlar ulushi 61 foizdan 68 foizga koʻtarilgan. Bolgariya, Kipr, Chernogoriya, Serbiya va Ruminiyada ham oʻquvchilarning yarmidan koʻpi mazkur darajaga yeta olmagan.
Keltirilgan taqqoslashda eng yaxshi koʻrsatkich Estoniyada qayd etilgan: matematik savodxonligi bazaviy darajadan past boʻlgan oʻquvchilar ulushi 17,2 foizni tashkil qilgan. Biroq bu mamlakatda ham natija yomonlashgan - 2018-yilda koʻrsatkich 10,2 foiz edi.
Shveysariyada bazaviy darajaga yetmagan oʻquvchilar ulushi 23,2 foiz, Irlandiyada esa 24,2 foiz boʻlgan.
Turkiya taqqoslashga kiritilgan mamlakatlar orasida ushbu koʻrsatkich biroz yaxshilangan yagona davlat boʻlgan. U yerda past natija koʻrsatgan oʻquvchilar ulushi 2018-yildagi 36,6 foizdan 2025-yilda 35,7 foizga tushgan.
Eng keskin yomonlashuv Norvegiyada kuzatilgan. Mamlakatda matematikadan bazaviy darajaga yetmaganlar ulushi 18,9 foizdan 38 foizga koʻtarilib, qariyb ikki baravar oshgan. Kipr, Sloveniya va Islandiyada ham sezilarli pasayish qayd etilgan.
PISA matematik savodxonlikni oltita asosiy daraja boʻyicha baholaydi. Ikkinchi daraja bazaviy hisoblanadi: unga yetgan oʻquvchi zamonaviy jamiyatda yashash va ishlash uchun zarur boʻlgan eng kam matematik koʻnikmalarga ega deb qaraladi.
Bazaviy darajaga yetmaslik oʻquvchi matematikani umuman bilmaydi degani emas. Bu uning bilimlarini amaliy masalalarni yechishda qoʻllash koʻnikmasi belgilangan minimal mezonga yetmaganini anglatadi.
