DW xabariga koʻra, Irlandiyaning Yevropa ishlari boʻyicha vaziri Tomas Birn bu haqda 12-oktabr kuni X ijtimoiy tarmogʻida maʼlum qilgan.
U YEI davlatlari Ukraina va Moldova uchun ikkinchi va uchinchi klasterlarni ochish, Albaniya bilan muzokaralarda 17-, 18- va 19-boblarni, Chernogoriya bilan esa 20-bobni yakunlash boʻyicha kelishuvga erishganini bildirgan.
Ukraina uchun yangi klasterlarni ochishga Vengriya roziligini olishda taʼlim toʻgʻrisidagi qonunga kiritilgan oʻzgartishlar muhim ahamiyat kasb etgan.
12-oktabr kuni Ukraina Oliy Radasi milliy ozchiliklar huquqlariga taalluqli ushbu oʻzgartishlarni ikki oʻqishda va yaxlit holda maʼqullagan. Kechqurun deputat Yaroslav Jeleznyak qonunni prezident Volodimir Zelenskiy imzolaganini maʼlum qilgan.
YeIga qoʻshilish muzokaralari oltita yirik tematik guruh - klasterga boʻlingan. Ular qonunchilik va davlat siyosatining turli sohalarini qamrab oladi. Muzokaralar davomida nomzod mamlakatning YEI qoidalari va standartlarini qoʻllashga tayyorligi baholanadi.
Klasterlar «Asoslar», «Ichki bozor», «Raqobatbardoshlik va inklyuziv oʻsish», «Yashil kun tartibi va barqaror oʻzaro bogʻliqlik», «Resurslar, qishloq xoʻjaligi va hamjihatlik» hamda «Tashqi munosabatlar» deb nomlanadi.
Ukraina uchun birinchi - «Asoslar» klasteri 15-iyun kuni ochilgan edi. Yangi klasterlarni ochish aʼzolikka qabul qilishning oʻzi emas, balki tegishli sohalar boʻyicha muzokaralarni boshlash bosqichidir.
Avvalroq, 5-oktabrda YeIning kengayish masalalari boʻyicha komissari Marta Kos Ukraina va Moldova uchun ikki klasterni 13-oktabr kuni Lyuksemburgdagi hukumatlararo konferensiyada ochish mumkinligini aytgan. Konferensiya YeIning Umumiy ishlar boʻyicha kengashi yigʻilishi doirasida oʻtkazilishi belgilangan.
Kosning taʼkidlashicha, Ukraina va Moldova juda murakkab sharoitda tizimli islohotlar oʻtkazmoqda. Shunga qaramay, ular YeIga qoʻshilish muzokaralarida yetakchilik qilayotgan toʻrt mamlakat qatoriga kiradi.
Yevrokomissiya nomzod davlatlardagi islohotlarning barcha yoʻnalishlari boʻyicha batafsil bahosini 28-oktabrda, kengayishga oid yillik hisobotida eʼlon qilishi kutilmoqda.
Marta Kos Ukraina bir vaqtning oʻzida oʻz mavjudligini saqlab qolish uchun kurashayotgani va YeIga qoʻshilish jarayonida ishtirok etayotganini taʼkidlagan. Uning aytishicha, Kiyev byudjet va armiya ehtiyojlari uchun qoʻshimcha mablagʻ olish maqsadida ham islohotlarni davom ettirishi kerak.
