Qohiradagi terakt qurbonlari soni oshmoqda. Portlash joyidan video

Misr poytaxti Qohira shahridagi muqaddas Mark nomidagi koptlar soborida amalga oshirilgan terakt tufayli halok bo‘lganlar soni ortdi. Al Jazeera sayti mahalliy manbalarga asoslanib xabar qilishicha, qurbonlar soni 25 nafarga yetgan, kamida 50 kishi jarohatlangan.

Dastlabki ma'lumotlarda terakt 7 kishining o‘limiga sabab bo‘lgani aytildi. Keyinroq qurbonlar soni 18 nafarga yetgani xabar qilindi.

CBC Extra tvitterida qayd etilishicha, ibodatxonada 12 kilogramm trotilli portlovchi qurilma harakatga keltirilgan.

Hozirda hodisa ro‘y bergan hudud o‘rab olingan.

Ijtimoiy tarmoqda terakt joyida olingan videolar tarqalmoqda.

Ma'lum qilinishicha, oldindan belgilangan vaqtda portlagan bomba sobor binosi devoriga o‘rnatilgandi. Yana boshqa xabarlarga ko‘ra, portlovchi qurilma ibodat vaqtida noma'lum shaxs tomonidan ichkariga uloqtirilgan. Hozircha hech qaysi tashkilot ushbu portlash uchun javobgarlikni zimmasiga olmadi.

RIA Novosti agentligi Misr Ichki ishlar vazirligidagi manbasiga asoslanib xabar qilishicha, ushbu teraktdan so‘ng mamlakatdagi barcha cherkovlarda xavfsizlik choralari kuchaytirilgan.

Xristian-koptlar turli manbalarga ko‘ra, Misr aholisining 10 foizdan 20 foizgacha bo‘lgan qismini tashkil qiladi (taxminan 6,5-13 million kishi). Ularning aksar qismi Koptlar pravoslav cherkoviga, yana bir qismi — Koptlar katolik cherkoviga bo‘ysunadi. Keyingi vaqtlarda koptlar tez-tez diniy radikal kuchlar nishoniga aylanmoqda.