1-avgust kuni Moskvadagi Balzi Rossi nomli italyancha restoranda portlash ro‘y berdi. Milliy aksilterror qo‘mitasi noma’lum ayol ichkariga olib kirishga uringan qo‘lbola bomba harakatga keltirilganini ma’lum qilgan. «Kommersant» manbasi aniqlik kiritishicha, u kurer bo‘lgan va «sovg‘a» solingan qutini olib kelgan. Binoga kirishda uni qo‘riqchi to‘xtatgan va shu onda quti portlab ketgan. Katta ehtimol bilan, kurer o‘zi nima olib kelganidan bexabar bo‘lgan, deb yozadi «Kommersant». Nashrning qayd etishicha, portlash oqibatida ayolning tanasi «tom ma’noda sochilib ketgan».
Taxminlarga ko‘ra, restoranda Havo-kosmik kuchlari bosh qo‘mondoni Aleksandr Chaykoning yubileyi nishonlanayotgandi. U Rossiya Havo-kosmik kuchlari (havo hujumidan mudofaa tizimi uchun ham mas’ul) rahbarligiga u 2026-yil mayida tayinlangan, undan oldin Suriyadagi harbiy amaliyotga boshchilik qilgan, shuningdek, 2022-yilda rus qo‘shinlarining Kiyev oblastiga yurishini boshqargan. Kiyev oblasti ukrainlar tomonidan ozod qilinganidan keyin tinch aholi vakillari qiynoqqa solingani va o‘ldirilganiga oid ko‘plab dalillar topiladi. Ukraina tomoni Chaykoni Kiyev oblastidagi fuqarolik ob’yektlarini bombalashga buyruq berishda ham ayblagan. U Balzi Rossi’dagi ziyofatdan besh kun oldin 55 yoshga to‘lgandi. Xabarlarga ko‘ra, general go‘yoki restoranda qo‘shaloq bayram – ham tug‘ilgan kuni, ham yuqori lavozimga tayinlanganini nishonlamoqchi bo‘lgandi.
Voqea joyida uch kishi halok bo‘lgan, yana ikki kishi shifoxonada jon bergan. Portlashdan keyin Milliy aksilterror qo‘mitasi 21 kishi jarohatlangani, kurer, uni to‘xtatib qolgan qo‘riqchi hamda restoranga tashrif buyurganlardan biri (u portlash vaqtda verandada edi) halok bo‘lganini ma’lum qildi. Keyinroq yana ikki kishi shifoxonada vafot etgani haqida xabar tarqaldi. Rossiyaning Italiyadagi elchixonasi 3-avgust kuni e’lon qilgan postda ham Balzi Rossi’da besh kishi halok bo‘lib, 19 kishi «jiddiy jarohat olgani» aytiladi. Rasmiylar hodisani terakt deb atagan, ammo uning nishoni aynan Chayko bo‘lganini tasdiqlamagan.
Qurbonlar haqida rasman ma’lumot yo‘q. Norasmiy xabarlarda qurbonlar orasida Chaykoning kuyovi ham borligi aytiladi. «Verstka» xabariga ko‘ra, jabrlanganlardan biri generalning 25 yoshli qizi Mariya Chayko bo‘lishi mumkin (turmush o‘rtog‘ining familiyasi bo‘yicha Mariya Peredriy) – uning nomi kuchishlatar tuzilmalarga yaqin bo‘lgan telegram-kanallar tomonidan tarqatilgan jabrlanuvchilar ro‘yxatida keltirilgan. Ro‘yxatda Mariyaning turmush o‘rtog‘i, 27 yoshli Daniil Peredriy ham bor. Bloger Anatoliy Shariy ma’lumotiga ko‘ra, u «rafiqasi tomon uchib kelayotgan oskolka parchasini o‘z tanasi bilan to‘sgan». Peredriyning o‘limi bo‘yicha boshqa tafsilotlar yo‘q. General Chaykoning holati haqida ham ma’lum qilinmagan.
