“Tadbirkor ayol” O‘zbekiston ishbilarmon ayollar Assotsiatsiyasiga 25 yil to‘ldi

“Tadbirkor ayol” O‘zbekiston  ishbilarmon ayollar assotsiatsiyasining tashkil topganiga bu yil 25 yil to‘ldi. Shu  munosabat bilan “Zarafshon” kinokonsert zalida katta tadbir bo‘lib o‘tdi. Assotsiatsiyaga ayni paytda 14 ming nafardan ortiq tadbirkor ayol birlashgan.

O‘tgan  davr mobaynida tashkilot a'zolarining sa'y-harakatlari, ilgari surilgan loyihalar asosida 130 mingdan ortiq yangi ish o‘rni tashkil etildi. 14 ming nafardan ortiq xotin-qiz biznes asoslariga o‘qitildi. 9 mingdan ziyod vaqtincha ishsiz bo‘lgan ayollar mehnat bozorida xaridorgir bo‘lgan kasb-hunarga yo‘naltirildi. Elchixonalar bilan o‘rnatilgan hamkorlik tufayli ko‘plab ayollar O‘zbekiston va xorijiy mamlakatlari biznes forumlarida qatnashib, mamlakat eksport salohiyatini oshirishga munosib hissa qo‘shishmoqda.

Assotsiatsiya a'zolari kredit olish, ko‘rgazmalarda ishtirok etish, chet ellarga chiqish bilan bir qatorda, O‘zbekistondagi va chet ellardagi tadbirkor ayollar bilan tajriba almashish kabi imtiyozlarga ega.  Har bir hududiy bo‘limda tadbirkorlik alifbosi, biznesning huquqiy asoslari yuzasidan o‘quv-seminarlar, treninglar olib borish izchil yo‘lga qo‘yilgan. Shu o‘rinda 14 ta viloyat, 68 ta tuman va shahar bo‘linmalari va vakilliklarida xotin-qizlarning ijtimoiy-iqtisodiy bilimlarini oshirish, oilaviy tadbirkorlikni keng targ‘ib etish, samarali tadbirkorlik yuritishga yo‘naltirilgan talaygina ishlar amalga oshirildi. Ayniqsa, yoshlarimizni ish bilan ta'minlash borasida kollej bitiruvchi qizlari uchun o‘quv-seminarlar  tashkil etildi. Ularga  tadbirkorlik xususida ilk saboqlar, ko‘nikmalar berildi. Kollej bitiruvchilaridan 491 nafari ishga joylashtirildi, 45 nafar qiz o‘z biznesini yo‘lga qo‘ydi.

Har bir viloyatda 120 tadan 4 xil yo‘nalishda, Respublika bo‘yicha 60 mingta  nafardan ortiq xotin-qizlar yangi kasbga yo‘naltirildi.
Hozirgi kunda O‘zbekistonda kichik biznes sub'yektlarining 120 mingdan ziyodini, xususan fermer xo‘jaliklarining 4 ming 550 dan ortig‘ini xotin-qizlar samarali boshqarmoqda.