Tadqiqot: O‘zbekiston aholisining kunlik tuz iste'moli JSST tavsiyasidan 3 marta ko‘pdir

O‘zbekiston sog‘liqni saqlash vazirligi 2015-2016 yillar mobaynida O‘zbekiston aholisining tuz iste'mol qilish darajasini aniqlash bo‘yicha tadqiqot olib bordi. U Jahon sog‘liqni saqlash tashkiloti bilan hamkorlikda amalga oshirilgan, deb yozmoqda Podrobno.uz sayti.

O‘zbekiston Respublikasi JSSTning Yevropa mintaqasida shunday tadqiqot o‘tkazgan ilk mamlakat bo‘lgani ta'kidlanmoqda. Aholi o‘rtasida tuz iste'moli darajasini o‘rganish natijasida aniqlanishicha, respublikaning 18-64 yoshli aholisi orasidagi tuz iste'mol qilish miqdori kuniga o‘rtacha 14,9 grammni tashkil etadi. 

Bunda, 46,5 foiz aholining tuz iste'moli yuqori ekani (kuniga 15 grammdan ko‘p) 53,2 foiz aholining bu boradagi ko‘rsatkichi o‘rtacha, (kuniga 7,5-15,0 g) va 0,3 foiz fuqarolar kam (kuniga 7,5 grammdan kam) ekani ta'kidlangan. Katta yoshdagi erkaklarning 75 foizi kuniga 15 grammdan ko‘p tuz iste'mol qiladi. 

Shu bilan birga, jinslar o‘rtasida, shuningdek, shahar va qishloqliklar orasida ham tuz iste'moli borasida tafovut aniqlanmagan. Umuman, tadqiqot natijasi shuni ko‘rsatganki, O‘zbekiston aholisining tuz iste'mol qilish darajasi Jahon sog‘liqni saqlash tashkiloti tavsiya qilgan bir kunlik me'yordan (kuniga 5 grammdan kam) 3 marta ortiqdir. 

Tibbiyot sohasi mutaxassislarining fikricha, tuzni ko‘p iste'mol qilish qon bosimi ortishiga olib keladi. Buning natijasida, yurak xastaliklari va insult xavfi kuchayadi. 

Agar, kunlik tuz iste'molini tavsiya qilingan 5 grammlik ko‘rsatkichga tushirishga erishilsa, jahon bo‘yicha bir yilda 1,7 million insonning yuqoridagi kasalliklar tufayli jon berishining oldi olingan bo‘lar edi. Insonlar ko‘p hollarda, bir kunda qancha tuz iste'mol qilayotganlarini tasavvur ham qila olishmaydi. Ko‘plab mamlakatlarda, tuzning katta qismi qayta ishlangan oziq-ovqat mahsulotlari yoki ko‘proq iste'mol qilinadigan mahsulotlar (non) orqali qabul qilinadi.