Yaponiyada reklama kompaniyasi rahbari o‘z joniga qasd qilgan xodimi sabab iste'foga chiqdi

Yaponiyadagi Dentsu reklama kompaniyasi prezidenti Tadasi Isii iste'foga chiqishi haqida ma'lum qildi. Bunga xodimlaridan birining doimiy ravishda ortiqcha ishlagani sabab o‘z joniga qasd qilgani turtki berdi. Bu haqda Nikkei xabar qilmoqda.

Prezident marhumaning oila a'zolaridan uzr so‘rab, uning vafoti uchun barcha mas'uliyatni o‘z bo‘yniga olishi haqida aytib o‘tdi. Isii 2017 yilning martida direktorlar kengashidan ham ketmoqchi, deb ta'kidlaydi nashr.

Bundan tashqari, Dentsu prezidentining tan olishicha, kompaniyada ish vaqtidan so‘ng ham qolib mehnat qilish holatlari uchrab turibdi. Bu vaziyat mehnat organlari tomonidan bir necha bor tanqid qilinganidan so‘ng ham kuzatilgan.

Yaponiya mehnat vazirligi 2016 yilning sentabrida Dentsu’ning 24 yoshli xodimasi Matsuri Takaxasi 2015 yil dekabrida ishdagi doimiy charchashlar sabab o‘z joniga qasd qilgani haqida ma'lum qildi. Qiz bir oyda belgilangan ish vaqtidan taxminan 105 soat ko‘proq ishlagan.

Mamlakat hukumati esa 2016 yilning noyabrida kompaniya rahbariyatiga nisbatan surishtiruv ishlarini boshladi. Dentsu top-menejmenti xodimlarni ish vaqtidan so‘ng ham qolib mehnat qilishga majburlagan bo‘lishi mumkin. Kompaniya 2016 yilning 21 noyabr kuni «o‘limgacha ishla» prinsipidan voz kechishi haqida ma'lum qildi.

kecha esa kompaniya rahbariyatiga oid hujjatlar prokuraturaga yuborildi.