10 dekabr kuni Istanbuldagi "Beshiktosh" jamoasi stadioni yaqinida sodir etilgan terakt vaqtida omon qolgan yigit shaharda Yangi yil bayrami vaqtida sodir etilgan terakt qurboniga aylangan. Bu haqda Daily Sabah xabar tarqatdi.
Istanbulning Yevropa qit'asidagi qismida joylashgan Reina nomli tungi klubga 1 yanvarga o‘tar kechasi Yangi yil bayrami nishonlanayotgan vaqtda Kalashnikov avtomati bilan qurollangan terrorchi bostirib kirdi va odamlarni o‘qqa tutdi. Qurbonlar soni 39 nafarni tashkil etdi, yana 69 kishi jarohatlangan holda shifoxonaga yotqizilgan.
Gazetaning yozishicha, hujumning ilk qurboniga aylangan politsiyachi Fotih Chaqmoq klub yaqinida soqchilik qilayotgandi. U 10 dekabr kuni Beshiktosh tumanidagi stadion yaqinida politsiyachilarga hujum uyushtirilganida ham shu hududda bo‘lgan va omon qolgandi.
10 dekabr kungi terakt oqibatida 44 kishi halok bo‘lgan. Bu terakt uchun javobgarlikni "Ozod Kurdiston lochinlari" guruhi o‘z zimmasiga olgandi.
1 yanvar kungi terakt uchun javobgarlikni hali hech qaysi guruh o‘z zimmasiga olmadi.
