Oʻzbekistonning Istanbul shahridagi bosh konsulxonasi Turkiyaning Istanbul, Yalova va Kojaeli viloyatlarida yashayotgan hamda vaqtincha boʻlib turgan vatandoshlarni ob-havo sharoiti keskin yomonlashishi kutilayotgani sababli ogohlikka chaqirdi.
Qayd etilishicha, kuchli yomgʻir va shamol suv toshqinlari, yoʻllarda harakatlanishning qiyinlashishi hamda boshqa favqulodda holatlar xavfini yuzaga keltirishi mumkin.
Shu munosabat bilan konsulxona fuqarolardan zarurat boʻlmasa, uzoq masofalarga safar qilishdan tiyilishni, kuchli yogʻingarchilik vaqtida suv toʻplanishi mumkin boʻlgan pastqam hududlar, yerosti yoʻllari va tunnellardan uzoqroq boʻlishni soʻradi.
Qolaversa, dengiz sohillari, daraxtlar, elektr uzatish tarmoqlari va mustahkam oʻrnatilmagan konstruksiyalar yaqinida ehtiyotkorlikni oshirish hamdaa avtomobil boshqarishda tezlikni kamaytirish va xavfsiz masofani saqlashga chaqirildi.
Konsullik, shuningdek, Turkiyaning vakolatli idoralari tomonidan eʼlon qilinayotgan rasmiy ogohlantirish va tavsiyalarga qatʼiy amal qilishni eslatdi.
Istanbulda kuzatilayotgan kuchli jala sababli hokimlik tomonidan qator maʼmuriy cheklovlar joriy etildi. Jumladan, 14−15-oktabr kunlari shahar boʻylab barcha davlat va xususiy taʼlim muassasalarida anʼanaviy taʼlim bir kunga toʻxtatildi. Davlat idoralarida homilador, nogironligi bor hamda 8 yoshdan kichik farzandi boʻlgan ayol xodimlarga taʼtil berildi. Soat 21:00 dan boshlab mototsikl va ikki gʻildirakli transport vositalarining harakatlanishi taqiqlandi.
Qutqaruv va tezkor xizmatlarga 2,5 mingdan ortiq murojaat kelib tushgan boʻlib, 1200 dan ortiq suv bosish, 15 ta koʻchki, 1000 ga yaqin xonadon va ish joylariga suv kirishi hamda transport vositalariga zarar yetkazilishi qayd etilgan.
