Shimoliy Koreya AQSh hududiga yetib boradigan qit'alararo ballistik raketa yaratmoqchi

Shimoliy Koreya rahbariyati 2017 yil oxiri yoki 2018 yil boshigacha AQSh hududiga yetib boradigan, yadroviy kallakli qit'alararo ballistik raketa yaratishni o‘z oldiga maqsad qilib qo‘ydi. Bu haqda Londonda ishlagan va Janubiy Koreyaga qochib ketgan sobiq Shimoliy koreyalik diplomat Txe Yon Xoga iqtibos keltirgan holda "Ryonxap" axborot agentligi xabar bermoqda.  

"Shimoliy Koreya AQSh va Janubiy Koreyada siyosiy o‘zgarishlarni hisobga olib, 2017 yil oxiri yoki 2018 yil boshigacha AQShgacha yetib bora oladigan raketalarga o‘rnatish mumkin bo‘lgan, o‘lchamlari kichik yadroviy zaryadlarni yaratishni o‘z oldiga maqsad qilib qo‘ygan", deb aytgan sobiq diplomat.

5 yanvarda Koreya markaziy telegraf agentligining ma'lum qilishicha, Shimoliy Koreyada qit'alararo ballistik raketaning sinovdan o‘tkazilishi yakuniy bosqichda turibdi. Shimoliy Koreya yetakchisi Kim Chen In xalqiga yangi yil murojaatida "agar AQSh tajovuzkor siyosatini bas qilmasa, Shimoliy Koreya o‘z harbiy salohiyatini mustahkamlashini" aytgan. Shimoliy Koreya yetakchisi o‘z davlatini "Sharqning yadroviy davlati" deb atagan.

BMT Xavfsizlik kengashi rezolyutsiyasi Shimoliy Koreyaga ballistik raketa sinovlarini o‘tkazishni taqiqlaydi. Pxenyanda bu hujjatlar tan olinmaydi, chunki mamlakat Vashingtonning dushmanona siyosati sababli o‘zining mudofaa qobiliyatini oshirishga to‘liq huquqqa egaligi aytiladi.