DW xabariga koʻra, bu haqda shanba kuni Janubiy Koreya Shtab boshliqlari birlashgan qoʻmitasi maʼlum qilgan.
«Janubiy Koreya, AQSH va Yaponiya Shimoliy Koreya ballistik raketalari haqida yaqindan axborot almashgan holda yuqori jangovar shaylikni saqlamoqda», - deyiladi Seul bayonotida.
Xabarda raketaning aniq turi, qancha masofaga uchgani va qayerga tushgani haqida maʼlumot keltirilmagan.
Avvalroq chegaradagi portlashda uch harbiy jarohatlangan
Raketa uchirilishi haqidagi xabar ikki Koreya oʻrtasida chegaradagi portlash yuzasidan kelishmovchilik davom etayotgan bir paytda tarqaldi.
21-sentabr kuni chegara hududida sodir boʻlgan portlash oqibatida Janubiy Koreyaning uch nafar harbiy xizmatchisi jarohatlangan.
AFP agentligi Janubiy Koreya harbiy manbalariga tayanib xabar berishicha, Seul hodisaga Shimoliy Koreyaning piyodalarga qarshi minalari portlashi sabab boʻlgan deb hisoblamoqda.
Janubiy Koreya mudofaa vaziri Kan Sin Chxol Pxenyanni sulh kelishuvini buzishda ayblab, javob choralari koʻrish niyatini bildirgan. Shtab boshliqlari birlashgan qoʻmitasi esa KXDRdan uzr soʻrashni talab qilgan.
Pxenyan ayblovlarni rad etdi
Shimoliy Koreya portlashga aloqadorligi haqidagi ayblovlarni qabul qilmagan.
KXDR rahbari Kim Chen Inning singlisi Kim Yo Chjon Janubiy Koreya tomonining bayonotini «oʻta tuban va iflos» deb atagan. Uning soʻzlarini Shimoliy Koreyaning KCNA davlat axborot agentligi tarqatgan.
Ikki davlat oʻrtasida tinchlik shartnomasi yoʻq
Shimoliy va Janubiy Koreya rasman hamon urush holatida hisoblanadi. Koreys urushi 1953-yilda sulh kelishuvi imzolanishi bilan toʻxtagan, ammo rasmiy tinchlik shartnomasi tuzilmagan.
Ikki davlatni demilitarizatsiya qilingan zona ajratib turadi. Minalar oʻrnatilgan ushbu hududning oʻrtasidan demarkatsiya chizigʻi oʻtadi. Bu dunyodagi eng qattiq qoʻriqlanadigan va minalar eng koʻp joylashtirilgan chegaralardan biri hisoblanadi.
