O‘zbekiston 2016 yilning 4-choragida 508 million AQSh dollariga teng kredit bitimlarini imzoladi

O‘zbekiston hukumati 2016 yilning to‘rtinchi choragida xalqaro moliya institutlari bilan 508 million AQSh dollariga teng kredit bitimlarini imzoladi. Bu haqda Uzdaily.uz xabar bermoqda.

Xususan, O‘zbekiston hukumati va Jahon banki “Mintaqaviy avtomobil yo‘llarini rivojlantirish” loyihasi doirasida 200 million AQSh dollarilik kredit bitimini imzoladi. Loyiha qiymati 240 million AQSh dollariga teng.

Loyiha Toshkent, Farg‘ona, Andijon va Namangan viloyatlaridagi ustuvor mintaqaviy avtomobil yo‘llarining 37 qismidagi umumiy uzunligi 394 kilometr bo‘lgan yo‘llarni rekonstruksiya qilish imkonini berdi. 

Shuningdek, O‘zbekiston Islom taraqqiyot banki bilan “Sirdaryo viloyatining Guliston, Shirin va Yangiyer shaharlaridagi kanalizatsiya tarmoqlarini rekonstruksiya qilish va kengaytirish” loyihasi moliyalashtirishni rivojlantirish bo‘yicha kredit bitimini imzoladi. Kredit miqdori 57,5 million AQSh dollari, loyiha qiymati esa – 60,8 million AQSh dollarini tashkil etadi.

Loyiha oqova suvlar tomonidan atrof-muhitning ifloslanishini kamaytirish, mavjud kanalizatsiya tozalash inshootlarini kengaytirish orqali oqova suvlarni yig‘ish va tozalash tarmoqlari samaradorligini oshirishga qaratilgan. 
 
O‘zbekiston Fransiya taraqqiyot agentligi bilan “Samarqand shahrida maishiy qattiq chiqindilarni boshqarishni modernizatsiya qilish” loyihasini amalga oshirish bo‘yicha 23,5 million AQSh dollari qiymatiga ega kredit bitimini imzoladi.

Loyiha qiymati 36,5 million AQSh dollari bo‘lib, Samarqand shahrida chiqindilarni yig‘ish, qayta ishlash hamda utilizatsiya qilishni moliyalashtirishni qamrab oladi. 

O‘zbekiston 2016 yilning to‘rtinchi choragida Janubiy Koreya Eksimbanki bilan ikkita kredit shartnomasini imzoladi.

Xususan, “Toshkent shahri aeroportida yangi xalqaro yo‘lovchi terminalini qurish (Toshkent-4)” loyihasini moliyalashtirish bo‘yicha kelishuv imzolandi. Koreya Eksimbanki shartnoma doirasida qiymati 430,4 million AQSh dollari bo‘lgan loyihani moliyalashtirishga 200 million AQSh dollari hajmidagi kredit taqdim etadi.

Loyiha Toshkent shahri xalqaro aeroporti infratuzilmasini yangi yo‘lovchi terminali qurish, aeroportdagi yo‘lovchilar o‘tkazish hajmini oshirish, xalqaro havo yo‘nalishlari yo‘lovchilariga xizmat ko‘rsatish sifatini oshirish orqali rivojlantirishga mo‘ljallangan.

Shuningdek, Janubiy Koreya Eksimbanki O‘zbekistonga “Elektron hukumat” tizimining ma'lumotlarni qayta ishlash Markazini yaratish” loyihasini amalga oshirishga 27,4 million AQSh dollari miqdorida kredit ajratdi. Loyiha qiymati 41,43 million AQSh dollariga teng.

Loyiha “Elektron hukumat” tizimining ma'lumotlarni qayta ishlash va saqlash infratuzilmasini yaratishga, shuningdek, interaktiv davlat xizmatlarini rivojlantirish va davlat organlari axborot resurslari axborot xavfsizligini ta'minlashga imkon beradi.