“Bollivud qiroli” sifatida mashhur bo‘lgan hindistonlik aktyor Shohruh Xonning muxlislar bilan uchrashuvi paytida tiqilinch yuzaga keldi. Buning oqibatida bir kishi halok bo‘lgan, deb xabar berdi Indian Express nashri.
Aktyor dushanba kuni kechqurun Gujarat shtatidagi Vadodara shahriga kelgan. U o‘zining “Rais” nomli yangi filmi ekranlarga chiqishi arafasidagi reklamasi bilan shug‘ullanmoqda. Shohruh Xon poyezddan chiqishni istamagan hamda oynadan turib o‘z muxlislariga qo‘l silkitib, ularga radiokarnay orqali murojaat qilgan. Poyezd bekatda o‘n daqiqa atrofida turgach, katta tiqilinch yuzaga kelishni boshladi. Politsiya rezina tayoqlardan foydalanishga majbur bo‘lgan.
"Poyezd harakatlanishni boshlagach, kishilar uning ortidan yugurishni boshladi. Tiqilinch tufayli bir kishi havo yetishmasligidan halok bo‘ldi, ikki politsiyachi jarohat oldi", - deya ma'lum qilishgan politsiyada.
Halok bo‘lgan insonning ismi Farid Xon Patxan ekani aniqlandi. Aktyor marhum oila a'zolariga hamdardlik bildirdi.
"Men uning uchun duodaman", - deya ma'lum qildi aktyor Dehliga yetib kelgach.
Ma'lumot uchun, Shohruh Xon Bolivvudning eng ko‘p haq oluvchi “yulduzlaridan” biri sanaladi. U 1965-yilda tug‘ilgan bo‘lib, 1990-yillarda hind kinosining eng mashhur aktyorlaridan biriga aylandi. U “Devdas”, “Sevishganlar”, “Yagonam”, “Mening ismim Xon”, “Vir va Zara” “Chennay ekspressi” kabi mashhur filmlarda bosh rolni ijro etgan.
