The Times of India xabariga koʻra, apparat mustaqil parvoz qilish, yoʻnalishni belgilash va taktik manyovrlarni bajarishga moʻljallangan. Kompaniya undan razvedka, kuzatuv, zarba berish hamda boshqa samolyotlar bilan birgalikdagi operatsiyalarda foydalanishni koʻzlamoqda.
FWD Supreme Heavy taxminan bir tonna vaznli uchish apparatlari toifasiga kiradi. Ishlab chiqaruvchi eʼlon qilgan koʻrsatkichlarga koʻra, uning kreyserlik tezligi soatiga 500–600 kilometr, parvoz davomiyligi ikki soat, foydali yuk koʻtarish quvvati esa qariyb 350 kilogramm boʻlishi kerak. Kompaniya parvoz masofasini 1500 kilometrdan ortiq deb koʻrsatgan.
Bu raqamlar hozircha ishlab chiqaruvchining bayonotiga asoslangan. Taqdimotda yerdagi prototip koʻrsatilgan, xabarda esa parvoz sinovlari natijalari keltirilmagan.
FWDA maʼlumotiga koʻra, platforma toʻliq Hindistonda ishlab chiqilgan va mamlakatning oʻzida ishlab chiqariladi. Kompaniya oʻz texnologiyalari, sunʼiy intellekt tizimlari va ishlab chiqarish hajmini oshirish orqali ilgʻor jangovar aviatsiyani arzonlashtirishni maqsad qilgan.
