Vazirning aytishicha, mamlakatda aviatsiya texnikasini ishlab chiqarish uchun zarur sanoat muhiti rivojlanmoqda.
«Ikki yil ichida Hindistonda ishlab chiqarilgan fuqarolik samolyotiga ega boʻla olamiz», - degan Naydu.
Biroq u loyihani amalga oshirishi kutilgan qoʻshma korxona haqida batafsil maʼlumot bermagan. Samolyotning modeli, sigʻimi, hamkor kompaniyalar va ishlab chiqarishda mahalliy qismlar ulushi ham ochiqlanmagan.
Shu bois bayonot mamlakatda samolyot ishlab chiqarishni yoʻlga qoʻyish maqsadini anglatadi. Uning butunlay yangi, mustaqil loyihalangan samolyot boʻlishi haqida hozircha aniq maʼlumot yoʻq.
Naydu Hindiston aviatsiya bozoridagi talabga ham toʻxtalgan. Uning maʼlumotiga koʻra, mahalliy aviakompaniyalar umumiy qiymati qariyb 100 mlrd dollar boʻlgan 1 600 tadan ortiq samolyotga buyurtma bergan.
Hozirda mamlakatda 165 ta aeroport mavjud. Hindiston aviakompaniyalari parki esa taxminan 850 ta havo kemasidan iborat.
Kelgusi oʻn yilda yana 100 tadan ortiq yangi aeroport paydo boʻlishi kutilmoqda.
Hukumat aviatsiya dvigatellarini ham mamlakatning oʻzida ishlab chiqarish imkoniyatini koʻrib chiqadi. Biroq vazir bunday ishlab chiqarish quvvatlarini yaratish ancha vaqt talab qilishini taʼkidlagan.
