Abramov va Buxoro ertagi davom etadi: Endi uning o‘zi Buxoroda rasman ishlamayotganini aytdi

«Buxoro» maslahatchi-murabbiyi sifatida klub rasmiy saytida tanishtirilgan Vadim Abramov aslida bu lavozimda rasman ishlamasligi haqida gapirib o‘tdi.

«Buxoroliklar meni taklifim bilan Ulug‘bek Baqoyevni bosh murabbiy sifatida tayinlashdi va mendan yordam berishimni so‘rashdi. O‘z o‘rnida men ham bundan xursandligimni, Baqoyev Buxoro futboli uchun begona emasligini, lozim bo‘lsa, imkon qadar qo‘limdan kelgancha yordamimni ayamasligimni aytdim.

Men shunchaki Ulug‘bek Baqoyevga yordam beraman. Oldin aytilganidek maslahatchi murabbiy bo‘lib ishlamayman. Klubda rasman faoliyat olib bormayman. Shunchaki Baqoyevga chempionat boshlanguniga qadar yordam beraman. Mavsum boshlanishiga oz vaqt qoldi, shu bois komplektatsiya va boshqa istalgan savollarni yechishga yordam beraman.

Agar boshqa klublardan taklif tushadigan bo‘lsa, ularni ko‘rib chiqishga tayyorman. Ma'qul taklif bo‘lsa, men aniq o‘sha taklifni qabul qilaman. Shunday ekan, men klubga ham, sizga ham to‘g‘risini aytayapman. Birovni aldash menga begona. Ayni damda Ulug‘bek Baqoyevga qo‘limdan kelganicha yordam beraman. Yangi klublardan taklif tushgan taqdirda, ko‘rib chiqaman. Takliflar uchun ochiqman», deya Abramovning so‘zlarini keltiradi «Erudit-Sport».