O‘zbekistonlik fermerlar va mutaxassislar Vetnam tajribasini o‘rganishadi

O‘zbekistonlik fermerlar, agrosanoat kompleksi mutaxassislari va olimlari ushbu sohadagi tajribani o‘rganish maqsadida Vetnamga ketishdi. 

2017 yil 7–13 fevral kunlari O‘zbekiston Respublikasi Bosh vaziri o‘rinbosari, qishloq va suv xo‘jaligi vaziri Zoir Mirzayev rahbarligidagi delegatsiya Vetnam Sotsialistik respublikasida rasmiy tashrif bilan bo‘ladi. Bu haqda O‘zbekiston qishloq va suv xo‘jaligi vazirligi matbuot xizmati xabar qilmoqda. 

Tashrifdan ko‘zlangan asosiy maqsad, ikkala mamlakat o‘rtasidagi iqtisodiy hamkorlikni yanada kengaytirish, qishloq xo‘jaligi va hududlarni rivojlantirish, aholi bandligini ta'minlash borasidagi Vetnam tajribasini o‘rganishdir.

Delegatsiya tarkibi qishloq xo‘jaligi sohasi mutaxassislari, ilmiy-tadqiqot institutlari olimlari, shuningdek, fermerlardan iborat.

Vetnam aholisi soni bo‘yicha dunyoda 13-o‘rinda turadi. U yerda 76 mln kishi istiqomat qiladi. Shundan 34 mln kishi mehnatga layoqatli hisoblanadi. Garchi so‘nggi bir necha o‘n yillarda respublika sanoati jadal sur'atlarda rivojlanayotgan bo‘lsa-da, agrar soha iqtisodiyotning asosiy bo‘g‘inlaridan biri bo‘lib qolmoqda. Qishloq xo‘jaligining YaIM (yalpi ichki mahsulot)dagi ulushi 21 foizni tashkil etadi. Mehnatga yaroqli aholining 50 foizga yaqini qishloq xo‘jaligi bilan shug‘ullanadi. Har bir oila 1 gektardan bir necha gektargacha bo‘lgan yerlarga ishlov berishadi.