Germaniyada kansler lavozimi uchun kurash: Merkel qanday pozitsiyada?

Germaniyaning amaldagi kansleri Angela Merkel mamlakat aholisi orasida mashhurlik darajasi bo‘yicha Yevroparlament sobiq rahbari, kansler lavozimiga nomzodlardan biri Martin Shultsni 1 foizga ortda qoldirmoqda. Bunday ma'lumotlar Stern jurnali va RTL teleradiokompaniyasi buyurtmasi bilan Forsa ijtimoiy tadqiqotlar instituti tomonidan o‘tkazilgan so‘rovda keltirildi.

Xabar qilinishicha, agarda GFR kansleri saylovlari ayni damda o‘tkazilganda, mamlakatning 38 foiz aholisi o‘z ovozini Merkelga, 37 foizi esa Shultsga bergan bo‘lardi. Shu tariqa, Merkelning reytingi bir haftada 1 foizga o‘sdi, Shultsni qo‘llab-quvvatlovchilar soni esa avvalgi darajada qolgan.

"Shults Merkelning o‘rnini egallashi uchun hozir ishonchli dasturni taqdim etishi kerak", - deya ma'lum qildi Forsa instituti rahbari Manfred Gyullner.

Germaniya Sotsial-demokratik partiya reytingi ham o‘zgarmadi – uni so‘rovdan qatnashganlarning 31 foizi qo‘llab-quvvatlaydi. Merkel boshchiligidagi Xristian-demokratlar va Xristian-sotsiallar ittifoqi partiyalarining birgalikdagi ittifoqi sotsial-demokratlarni 3 foizga ortda qoldirmoqda. “Germaniya uchun muqobillik” partiyasi avvalgi hafta bilan solishtirganda 1 foizni yo‘qotgan bo‘lsa, undan keyingi o‘rinlarda “So‘llar” va “Yashillar” bormoqda – ularda mos ravishda 8 va 7 foiz bor.

So‘rovnoma 5-10 fevral kuni o‘tkazilgan bo‘lib, unda 2,5 mingdan ortiq inson qatnashdi.

Germaniyada bundestag saylovlari joriy yilning 24-sentabr kuni bo‘lib o‘tadi.