Kim Chen Namning o‘g‘li otasi jasadini olib ketish uchun Malayziyaga yetib keldi

13 fevral kuni Kuala-Lumpurda hayotdan ko‘z yumgan Shimoliy Koreya yetakchisi Kim Chen Inning akasi Kim Chen Namning o‘g‘li otasi jasadini olib ketish uchun bu shaharga yetib keldi. Bu haqda Yaponiyaning NHK telekanali mahalliy manbalarga asosan xabar bermoqda.

Ba'zi ma'lumotlarga ko‘ra, Kim Xan Sol Malayziya poytaxtiga seshanba kuni ertalab yetib kelgan va otasining jasadi saqlanayotgan kasalxonaga borgan. NHK’ning xabar berishicha, bu vaqt davomida kasalxonani qo‘riqlash xizmati kuchaytirilgan, u yerga maxsus topshiriqli avtomatik qurolga ega 30-40 jangchi tashlangan. 

Telekanalning xabar berishicha, Kim Xan Sol kasalxonada saqlanayotgan marhum otasi ekanini tasdiqlagan. Shimoliy Koreyaning Malayziyadagi elchixonasi uning jasadini berishni talab qilmoqda. Biroq bu mamlakat hukumati marhum jasadi faqatgina uning yaqinlariga berilishini ma'lum qilgan. Ikki mamlakat o‘rtasida kelib chiqqan mojaro tufayli Malayziyaning Pxenyandagi elchisi yurtiga chaqirib olindi.

14 fevral kuni Malayziya politsiyasi Kim Chen Namning o‘limini tasdiqladi. Unga Kuala-Lumpur shahri aeroportida suiqasd qilishgan hamda kasalxonaga ketish chog‘ida hayotdan ko‘z yumgan. Huquqni muhofaza qilish organi xodimlarining ma'lumotiga ko‘ra, u yer usti xizmati xodimlariga kuchli bosh aylanishidan shikoyat qilib murojaat qilgan, shuningdek, noma'lum shaxs uning yuziga qandaydir suyuqlikni sepib yuborganini aytgan.

Boshqa taxminlarga ko‘ra, noma'lum ayol uning yuziga qandaydir modda bilan to‘yintirilgan matoni yaqinlashtirgan. Janubiy Koreya OAVlari zaharlangan ignalar yordamida hujum qilingani haqida xabar berishgandi. Biroq bu taxminlarning hech biri rasman tasdiqlanmadi.

Avvalroq Kim Chen Namga hujum qilinishiga oydinlik kirituvchi videolavha internet tarmog‘ida paydo bo‘lgani haqida xabar bergandik.

Ma'lumot uchun, Kim Chen Nam – KXDR sobiq yetakchisi Kim Chen Irning katta o‘g‘li bo‘lib, onasi taniqli mahalliy aktrisa Son Xe Rim hisoblanadi. 2001 yilning mayida u Yaponiyaga soxta pasport yordamida chiqib ketib, o‘sha vaqtdan beri xorijda istiqomat qilib kelgan.